JI bolashaqta adamdarmen resýrstar úshin básekege túsýi múmkin — Microsoft basshysy
ASTANA. KAZINFORM — Microsoft-tyń jasandy ıntellekt baǵytyndaǵy bóliminiń basshysy Mustafa Súleıman ózdiginen áreket etip, maqsat qoıyp, resýrstardy basqara alatyn AI júıelerin damytýdyń saldary týraly eskertti. Bul týraly Kazinform BBC-ge silteme jasap habarlaıdy.
Onyń aıtýynsha, jasandy ıntellektini adam sııaqty qabyldap, ózdiginen jumys isteıtin AI júıelerin baqylaýsyz damytý bolashaqta adamǵa uqsas áreket etetin jańa «kremnııli tirshilik ıeleriniń» paıda bolýyna ákelýi múmkin.
Mundaı júıeler ýaqyt óte kele óz maqsattaryn ózderi belgilep, aqsha taýyp, múlikke ıelik etip, tipti kompanııalardy basqara alatyn deńgeıge jetýi yqtımal. Súleımannyń pikirinshe, bul jaǵdaıda olar adamdarmen resýrstar úshin básekege túsýi múmkin.
— Eger biz ózdiginen áreket etip, maqsattaryn ózi belgileıtin, aqsha taýyp, múlikke ıe bolyp, kompanııalardy basqara alatyn AI júıelerin jasasaq, is júzinde adamdarmen resýrstar úshin básekelesetin jańa «kremnııli tirshilik ıelerin» dúnıege ákelýimiz múmkin, — dedi ol.
Súleıman mundaı jaǵdaıda jasandy ıntellekt júıeleriniń adamzatqa qanshalyqty jaqsy kózqarasta bolatyny mańyzdy bolmaı qalýy múmkin ekenin aıtty.
— Olardyń adamzatqa qanshalyqty qamqor bolatyny nemese bizdi qanshalyqty jaqsy kóretini mańyzdy emes, — dedi Microsoft ókili.
Sonymen qatar ol Anthropic kompanııasynyń jasandy ıntellekt ázirleý tásilin synǵa aldy. Súleımannyń pikirinshe, AI júıelerine adamǵa tán qasıetterdi telýdiń qajeti joq. Mundaı tásil antropomorfızatsııa, ıaǵnı jasandy ıntellektini adamǵa uqsatý dep atalady.
Onyń aıtýynsha, bul tásil Claude chat-botynyń jeke qalaýy, qundylyqtary men ózindik sanasy bar degen túsinik qalyptastyrýy múmkin.
Keıingi ýaqytta tehnologııa salasynyń mamandary jasandy ıntellektiniń qarqyndy damýyna baılanysty týyndaýy múmkin qaýipter týraly jıi eskertip keledi.
Eske salaıyq, buǵan deıin Ilon Mask pen OpenAI basshysy Sem Altman Anthropic kompanııasynyń bas dırektory Darıo Amodeıdiń jasandy ıntellektiniń eń qýatty júıelerin ázirleý qarqynyn báseńdetý týraly usynysyn qoldaǵanyn jazǵanbyz.
