Jasandy ıntellekt beınebaqylaý júıesi arqyly áskerdegi zańsyzdyqty anyqtaıdy

ASTANA. KAZINFORM — Qazaqstan áskerindegi zańsyz áreketterdi anyqtaý úshin beınebaqylaý júıesi jańartylmaq. Beınebaqylaý kameralary jasandy ıntellekt arqyly basqarylatyn bolady. Bul týraly QR Qorǵanys mınıstriniń orynbasary Darhan Ahmedıev aıtty.

«Qazirgi kezde áskerı bólimderdiń barlyǵy beınebaqylaý júıesimen qamtylǵan. Biraq osy júıege qatysty birneshe másele bar. Bul kameralar vıdeony eshbir analıtıkasyz túsirip jatyr, tek beıneni taspaǵa jazady. Biz osyǵan aqparattyq júıeni engizip jatyrmyz. Endi beınebaqylaýǵa avtomatty taldaý engiziledi, jasandy ıntellekt elementteri bar. Osy oraıda áskerı bólimge kimder kelgenin, bólimshe aýmaǵynda neshe adam júrgenin eseptep otyrady. Sondaı-aq adamdar toptalyp jınala bastasa, jaýapty adamdar negizsiz ornynan ketip qalsa osy kameralar kezekshilerge belgi beredi. Atap aıtqanda, sońǵy býyndy tehnologııa negizinde osy analıtıka engiziledi», - dedi D. Ahmedıev Parlament Májilisinde tilshiler suraǵyna jaýap bere otyryp.

Sonymen qatar ol Parlament depýtatynyń «áskerı bólimderdegi 50 myń beınekameranyń jazbasy qaıda?» degen saýalyna qatysty pikir bildirdi.

«Osy depýtattyq saýalmen tanystym. Qazir áskerı bólimderdegi kameralar qosylǵan júıe analıtıka jasaı almaıdy. Sondyqtan osy taldaýdy avtomatty túrde jasaý jaǵdaıdy edáýir jeńildetedi», - dedi mınıstrdiń orynbasary.

Eske sala keteıik, bıyl qyrkúıek aıynda Májilis depýtaty Qorǵanys mınıstriniń atyna saýal joldap, áskerı bólimderdegi 50 myń beınekameraǵa qatysty syn aıtqan edi.