Jasandy ıntellekt áserinen qandaı mamandyqtar joıylyp ketýi múmkin — sarapshylar pikiri
ALMATY. KAZINFORM — Almatyda jasandy ıntellekt salasyndaǵy AlmatyFair.ai kórmesi óz jumysyn bastady. Kórme 30 naýryzǵa deıin jalǵasady.
Kórmede kompanııalar jasandy ıntellektke qatysty ınnovatsııalyq jobalary men zamanaýı sheshimderin usynatyn startaptar alleıasy boı kóterdi. Іs-shara barysynda AI salasynyń mamandary men sarapshylar jasandy ıntellektiniń damýy áserinen qandaı mamandyqtar joıylyp ketýi múmkin ekenin aıtty.
AQSh pen Ulybrıtanııanyń quqyq qorǵaý jáne barlaý qyzmetteri qoldanatyn Black Ice AI jobasynyń negizin qalaýshysy Elısar Nurmaǵambetov JI kóptegen salada ortasha mamandardy basyp ozǵanyn aıtty.
— Iá, qazirdiń ózinde ortasha deńgeıdegi programmıst, marketolog, zańgerlerge qaraǵanda AI jumysty jaqsyraq istep jatyr. Sondyqtan bul salalarda jappaı avtomattandyrýǵa kóshý bolýy múmkin. Sonymen qatar bolashaqta iri kompanııalar programmısterdiń sanyn kóbeıtkenshe AI arqyly óte tıimdi jumys isteıtin shaǵyn toptar qurady dep oılaımyn. Al Jasper AI búgingi kúni marketologtyń jumysynyń 50 paıyzyn avtomattandyra alady. Sondyqtan bul barlyq salalarǵa áser etip jatyr, — dedi Elısar Nurmaǵambetov.
Almaty qalasy Jastar saıasaty basqarmasynyń basshysy Azız Qajdanbek qazir Call-ortalyqtyń operatory, kopıraıter, montaj jasaýshy syndy mamandyqtarǵa suranys azaıyp jatqanyn atap ótti.
Bul máselege baılanysty «Qazaqtelekom» AQ Tsıfrlyq bıznes dıvızıonynyń bas dırektory Abylaıhan Ospanov ta pikir bildirdi.
— Adamdardyń jumys kúshin jasandy ıntellekt almastyryp jatqan basty jumystardyń biri — baılanys ortalyqtary. Qazir adamdar baılanys ortalyqtaryna habarlasyp, olarǵa jaýap berip turǵan tiri adam ne jasandy ıntellekt ekenin ajyrata almaıdy. Odan keıin monıtorıng júrgizetin mamandardy aıta alamyz. Mysaly, bizde jelilerdiń jumysyn, aqaýlaryn baqylaıtyn adamdardyń jumysy avtomattandyrylǵan. Burynǵydaı 10-15 adam emes, qazir datchıkterdi baqylaıtyn 1-2 maman ǵana otyrady, — dedi ol.
Sondaı-aq Abylaıhan Ospanov satý menedjeri men aýdarmashy mamandyqtardy aldaǵy ýaqytta joıylýy múmkin ekenin atap ótti. Aıtýynsha, qazirdiń ózinde olardyń jumysyn da jasandy ıntellekt tıimdi oryndaı alady.
Al nFactorial mektebiniń negizin qalaýshy ári dırektory Arman Súleımenov kóptegen mamandyq joıylmasa da, biraz ózgeriske túsetinin túsindirdi.
— Tehnologııanyń damýymen keı mamandyq joıylyp, onyń ornyna basqa mamandyqtar paıda bolyp jatady. Al keı jumys túri ózgere otyryp ózin saqtap qaldy. Mysaly, jazýshylar qazir de bar. Olar burynǵydaı jazý mashınasymen emes, kompıýtermen jumys isteıdi. Smartfondardyń taraýymen bárimiz fotografqa aınaldyq, biraq kásibı fotograftardyń jumysy toqtap qalǵan joq. Jasandy ıntellekt damýymen bári basqasha bolady deıin desek bolashaqty boljaı almaımyz. Sondyqtan qazir bizdiń tarapymyzdan AI-di shetke ysyryp qoıý — qatelik bolady, — dedi Arman Súleımenov.
Eske salaıyq, buǵan deıin Jaslan Mádıev jasandy ıntellekt Qazaqstandaǵy jumys oryndaryn qanshalyqty azaıtýy múmkin ekenin aıtqan bolatyn.