Jasandy ıntellekt arqyly ken baılyqtaryn barlaý isi jańa deńgeıge kóterildi
ASTANA. KAZINFORM – Jasandy ıntellekt búginde taý-ken óndirisinde jańa dáýirdiń bastaýyna aınalyp otyr. «Qazaqmys» kompanııasy geologııalyq barlaý jáne paıdaly qazbalardy óndirý salasyna tsıfrlyq tehnologııalardy engizý arqyly óndiris tıimdiligin jańa deńgeıge kóterýde.
Qazaqstannyń taý-ken salasynda tsıfrlandyrý qarqyny artyp keledi, al osy baǵytta aldyńǵy qatardan kórinip otyrǵan kompanııalardyń biri – «Qazaqmys» korporatsııasy. 2025 jyldyń mamyr aıynda kompanııa Micromine Advance atty jańa ıntellektýaldy júıeni Grade Copilot modýlimen birge iske qosty. Bul sheshim ken oryndaryn úshólshemdi keńistikte joǵary dáldikpen modeldeýge, taý jynystarynyń quramyn taldaýǵa jáne óndiris kólemin naqty boljaýǵa múmkindik beredi. Jasandy ıntellekttiń kómegimen alynǵan derekterdiń naqtylyǵy artyp, geologııalyq barlaý jumystarynyń sapasy men tıimdiligi edáýir jaqsardy.
Bul qadam Memleket basshysy Qasym-Jomart Toqaev aıqyndaǵan eldiń tsıfrlandyrý strategııasymen tolyq úndesedi. Prezıdent jasandy ıntellekt «qýatty, ádiletti jáne qaýipsiz Qazaqstan qurýǵa jańa múmkindikter ashatynyn» atap ótken bolatyn. «Qazaqmys» tájirıbesi osy sózdiń is júzinde júzege asyp jatqan aıqyn mysaly.
Kompanııa mamandary jańa tehnologııalardyń alǵashqy nátıjelerin Micromine paıdalanýshylarynyń VIII Ortalyq Azııa konferentsııasynda, Tashkent qalasynda tanystyrdy. Onda «Qazaqmys» geologııalyq barlaý departamentiniń dırektory Bekasyl Aýkeshev Weir Group kompanııasynyń Digital-dıvızıony prezıdenti Krısten Ýolsh (Ulybrıtanııa) jáne halyqaralyq satý jónindegi jetekshisi Greg Sleıtermen (AQSh) kezdesý ótkizdi. Taraptar baǵdarlamalyq sheshimderdiń keleshegi, jasandy ıntellekt quraldaryn damytý jáne qazaqstandyq geologtardyń kásibı biliktiligin arttyrý máselelerin talqylady.
Qazirgi ýaqytta kompanııada geologııalyq derekterdi tsıfrlandyrý qarqyndy júrip jatyr. Buǵan burynǵy jyldardaǵy muraǵattyq materıaldar da kiredi. Jınaqtalǵan aqparat biryńǵaı korporatıvtik geoaqparattyq standartqa biriktirilýde. Al Micromine baǵdarlamalyq ónimderi barlaýdan bastap óndirýdi josparlaýǵa deıingi barlyq kezeńde qoldanylyp keledi. Bul geologııalyq aqparattyń ashyqtyǵyn qamtamasyz etip, óndiristik sheshim qabyldaý úderisin jyldamdatady.
«Qazaqmys» korporatsııasy 2025 jyldyń sońyna deıin Micromine Advance jáne Alastri júıeleriniń jańa modýlderin engizýdi kózdep otyr. Bul tolyq tsıfrlyq ıntegratsııaǵa qol jetkizip, óndiristiń barlyq býynyn birtutas aqparattyq ortada biriktirýge jol ashady. Mundaı tásil adam faktorynyń yqpalyn azaıtyp, naqty ýaqyt rejıminde taldaý jasaýǵa múmkindik beredi.
Konferentsııa aıasynda geolog Jan Shomytov Jaman-Aıbat ken orny boıynsha júrgizilgen zertteý nátıjelerin usyndy. Micromine júıesiniń kómegimen mamandar mystyń mıneraldanýy men tektonıkalyq buzylystar arasyndaǵy baılanysty anyqtap, geologııalyq qurylymdardy taldaýda jasandy ıntellekttiń tıimdiligin dáleldedi. Bul zertteý ıntellektýaldy júıelerdiń kúrdeli tabıǵı protsesterdi túsinýge jáne mıneraldyq resýrstardy baǵalaýǵa aıtarlyqtaı úles qosatynyn kórsetti.
Búginde «Qazaqmys» kompanııasynda 400-den astam maman Micromine baǵdarlamasyn belsendi qoldanady. Korporatsııanyń qolynda 300-ge jýyq lıtsenzııa jáne 1400-den astam baǵdarlamalyq modýl bar. Barlyq geologııalyq derekterdiń 90%-dan astamy tsıfrlyq formatqa kóshirildi. Sonymen qatar, 500-den astam qyzmetker arnaıy oqytýdan ótti, olardyń kóbi halyqaralyq sertıfıkatqa ıe boldy.
Mundaı júıeli jumys nátıjesinde «Qazaqmys» Qazaqstandaǵy taý-ken salasyn tsıfrlandyrý baǵytyndaǵy kóshbasshylyq ornyn nyǵaıtyp keledi. Kompanııa tek tehnologııany engizip qana qoımaı, elimizdiń ónerkásiptik áleýetin damytýǵa jáne Prezıdent aıqyndaǵan basym baǵyttardyń biri — jasandy ıntellekt pen tsıfrlyq tehnologııalardy óndiriske engizý mindetin naqty júzege asyryp otyr.
Eske salsaq, Jezqazǵanda zamanaýı zerthanalar men tsıfrlyq tehnologııalardy qamtıtyn biregeı geologııalyq klaster qurylatyny týraly jazǵan bolatynbyz.