Jasandy ıntellekt Almaty oblysynda qylmysty ashýǵa qalaı kómektesip jatyr
ASTANA. KAZINFORM – Almaty oblysynda jasandy ıntellekt kómegimen ashylǵan qylmys sany 2,1 ese artqan. Quqyq qorǵaý organdary beınebaqylaý kameralary men beıneanalıtıka arqyly kúdikti kólikterdi izdep, joldaǵy qaýipti jaǵdaılardy anyqtaı alady. Sergek Group kompanııasynyń málimetinshe, qazir óńirde 9 myńnan astam kamera men 325 Sergek kesheni bir júıege biriktirilgen. Bul týraly Sergek Group kompanııasynyń jobalardy basqarý jónindegi dırektordyń orynbasary Perızat Baýyrjanqyzy Jibek Joly telearnasynyń «Búgin.LIVE» baǵdarlamasynda aıtyp berdi.
Onyń aıtýynsha, buryn polıtsııa qyzmetkerlerine beınejazbalardy muqııat qarap, qajetti aqparatty uzaq izdeýge týra keletin. Qazir jasandy ıntellekt pen beıneanalıtıka beınematerıaldardan mańyzdy derekterdi jedel tabýǵa kómektesedi. Bul tergeý jumysyna qajetti aqparatty qysqa ýaqytta anyqtaýǵa múmkindik beredi.
Júıe kóliktiń markasy, túsi, modeli nemese memlekettik nómiri týraly derekter arqyly ony izdeýge kómektesedi. Polıtsııa qyzmetkeri qolda bar málimetterdi júıege engizgen soń, beıneanalıtıka kameralardan alynǵan aqparatty saralap, kólikti anyqtaýǵa múmkindik beredi.
– Qazir kameralar beınejazbany túsirip, saqtap qana qoımaıdy. Jasandy ıntellekt pen beıneanalıtıka sol jazbalardy jedel taldaýǵa kómektesedi. Buryn polıtsııa qyzmetkerleri beınejazbalardy uzaq qarap, sodan keıin ǵana sheshim qabyldaıtyn. Qazir júıe qajetti aqparatty jyldam tabýǵa múmkindik beredi. Almaty oblysyndaǵy joba – biz úshin mańyzdy baǵyttardyń biri, – dedi Perızat Baýyrjanqyzy.
Mamannyń aıtýynsha, jasandy ıntellekt polıtsııa qyzmetkerin almastyrmaıdy. Ol beınejazbalardan qajetti derekterdi izdep, kúdikti jaǵdaılardy anyqtaýǵa kómektesetin qural retinde qoldanylady. Al alynǵan aqparatty tekserip, tıisti sheshim qabyldaý quqyq qorǵaý organdarynyń mindeti bolyp qala beredi.
Jasandy ıntellekt jol qaýipsizdigin qamtamasyz etýge de kómektesedi. Sergek júıesi joldaǵy jaǵdaıdy, buryn bolǵan apattardy, aýa raıy men kólik keptelisine qatysty derekterdi taldaıdy. Osy málimetter negizinde apat jıi bolatyn nemese qaýip deńgeıi joǵary ýchaskelerdi anyqtaýǵa múmkindik bar.
Degenmen júıe apattyń naqty qaı ýaqytta jáne qaı jerde bolatynyn dál boljaı almaıdy. Onyń mindeti – jınalǵan derekterge súıene otyryp, qaýipti ýchaskelerdi aldyn ala anyqtap, polıtsııa qyzmetkerlerine tıisti sharalardy josparlaýǵa kómektesý.
– Júıe apattyń naqty qaı jerde bolatynyn kesip aıta almaıdy. Biraq buryn bolǵan jol apattaryn, aýa raıyn jáne joldaǵy keptelisti taldaıdy. Osy derekter arqyly qaýipti ýchaskelerdi aldyn ala anyqtap, boljam jasaýǵa bolady. Bul polıtsııa qyzmetkerleriniń jumysyn jeńildetedi. Júıe men planshetter ózara baılanysta jumys isteıdi, – dedi kompanııa ókili.
Onyń sózinshe, jol-kólik oqıǵalary saldarynan bolatyn adam óliminiń azaıýyna jasandy ıntellekt pen beıneanalıtıkanyń da úlesi bar. Alaıda bul nátıjege tek tehnologııanyń arqasynda qol jetkizildi deýge bolmaıdy. Jol qaýipsizdigin qamtamasyz etýge polıtsııa qyzmetkerleri, patrýldik polıtsııa jáne jergilikti atqarýshy organdar da atsalysady.
Almaty oblysynda jasandy ıntellektke negizdelgen platformada júrgizýshilerdiń joldaǵy áreketin taldaýǵa arnalǵan modýlder de bar. Sonyń biri – sharshaǵan júrgizýshini anyqtaýǵa baǵyttalǵan júıe. Taǵy bir modýl jolda qaýipti áreket jasaıtyn júrgizýshilerdi belgileýge kómektesedi.
Máselen, kólik júrgizýshisi jyldamdyqty shamadan tys arttyryp, jolaqtardy qaıta-qaıta aýystyryp nemese qaýipti manevrler jasasa, júıe mundaı áreketterdi tirkep, polıtsııaǵa eskertý jibere alady. Bul quqyq qorǵaý organdaryna joldaǵy yqtımal qaýipti der kezinde baıqap, tıisti shara qabyldaýǵa múmkindik beredi.
Perızat Baýyrjanqyzynyń aıtýynsha, Sergek Group komandasy jasandy ıntellekt pen beıneanalıtıka múmkindikterin damytyp, olardy qalalyq ınfraqurylymnyń qaýipsizdigin arttyrýǵa paıdalanýdy kózdeıdi.
Kompanııanyń aldaǵy josparlarynyń biri – Smart City jobalaryn damytý. Mundaı júıeler qalalyq ortadaǵy túrli derekterdi biriktirip, jol qozǵalysyn basqarýǵa, qoǵamdyq qaýipsizdikti arttyrýǵa jáne qalalyq qyzmetterdiń jumysyn tıimdi uıymdastyrýǵa kómektesýi múmkin.
Aıta keeıik, jasandy ıntellekt qylmysty ózdiginen ashatyn nemese jol apatynyń aldyn alýǵa tolyq kepildik beretin qural emes. Degenmen beınejazbalardy jedel taldaý, kúdikti kólikterdi izdeý jáne qaýipti jol ýchaskelerin anyqtaý arqyly polıtsııanyń jumysyn jeńildetip, qaýipsizdikti kúsheıtýge múmkindik beredi.
Polıtseılerdiń robot-ıtteri Astananyń qaı aýmaǵynda jappaı iske qosylatynyn jazǵan edik.
