Jasandy ıntellekt alǵash ret jańa ómirsheń vırýstardy jasady
ASTANA. KAZINFORM – AQSh zertteýshileri jasandy ıntellekt kómegimen alǵash ret zerthanalyq jaǵdaıda kóbeıe alatyn jańa vırýstardy jasady. Jumys nátıjeleri Science ǵylymı jýrnalynda jarııalandy, dep habarlaıdy Kazinform.
Ǵalymdar vırýstar, bakterııalar, ósimdikter jáne adamdardan alynǵan genetıkalyq tizbekter boıynsha oqytylǵan Evo1 jáne Evo2 JI modelderin qoldana otyryp, vırýstardyń tolyq genomdaryn jasady. Sodan keıin eń perspektıvaly nusqalar zerthanada sıntezdeldi.
Zertteýshiler JI arqyly jasalǵan 302 jobadan 16 tolyq fýnktsıonaldy bakterıofag – bakterııalardy ǵana juqtyratyn vırýstar aldy. Olardyń barlyǵy Escherichia coli (ishek taıaqshasy) bakterııalaryn sátti joıdy jáne adamdarǵa eshqandaı qaýip tóndirmeıdi.
Zertteý avtorlarynyń aıtýynsha, bul tehnologııa bolashaqta antıbıotıkterge tózimdi ınfektsııalardy emdeý úshin qoldanylýy múmkin bakterıofagtardy ázirleýdiń jańa múmkindikterin ashady. Budan basqa, bul tabys jasandy ıntellekttiń sıntetıkalyq bıologııa salasyndaǵy áleýetin tanytyp otyr.
Sarapshylar sonymen birge mundaı tehnologııalardy odan ári damytý bıoqaýipsizdik talaptaryn qatań saqtaýmen qatar júrýi kerek ekenin atap ótti. Olardyń pikirinshe, bul saladaǵy ázirlemeler qaýipti aýrýlardy týdyrýy múmkin jańa vırýstardy jasaý úshin paıdalanylýy múmkin.
Osyǵan deıin Qytaıda jasandy ıntellekt ındýstrııasynyń kólemi bir jylda 40%-ǵa óskenin jazdyq.
