Jasandy ıntellekt agrosektordy qalaı ózgertedi: jańa saraptamalyq daıdjest jaryq kórdi
ASTANA. KAZINFORM – Qazaqstan Respýblıkasynyń Prezıdenti janyndaǵy Qazaqstannyń strategııalyq zertteýler ınstıtýty Ekonomıkalyq saıasatty taldaý bóliminiń basshysy Anna Alshanskaıa daıyndaǵan «Agroónerkásiptik keshenniń bolashaǵy: jasandy ıntellekt pen jańa tehnologııalardyń yqpaly» atty jańa analıtıkalyq daıdjest jaryq kórdi. Bul týraly ınstıtýttyń baspasóz qyzmeti málim etti.
Atalǵan daıdjest agroónerkásiptik keshenniń bolashaǵyn tehnologııalyq transformatsııalar aıasynda taldaýǵa arnalǵan.
— Qazirgi jahandyq damý kezeńinde azyq-túlik júıesi aýyl sharýashylyǵy salasyndaǵy eńbek resýrstarynyń qysqarýy, tabıǵı resýrstardyń tozýy, azyq-túlikke suranystyń artýy jáne geosaıası turaqsyzdyq sekildi birqatar syn-qaterlerge tap bolyp otyr. Osyndaı jaǵdaıda jasandy ıntellekt pen jańa tehnologııalar aýyl sharýashylyǵynyń tıimdiligin, ornyqtylyǵyn jáne beıimdelgishtigin arttyrýǵa baǵyttalǵan jańa modelderdi qalyptastyratyn mańyzdy faktorlarǵa aınalyp otyr, — delingen habarlamada.
Dúnıejúzilik ekonomıkalyq forýmnyń baǵalaýynsha, agrarlyq sektorǵa jasandy ıntellekt negizindegi tsıfrlyq tehnologııalardy engizý tabysy tómen jáne ortasha deńgeıdegi elderde jıyntyq ishki jalpy ónimniń jyl saıyn qosymsha 450 mlrd AQSh dollaryna ósýine múmkindik beredi. Bul shamamen 28%-dyq ósimge teń.
Daıdjestte azyq-túlik qaýipsizdigin nyǵaıtýǵa, aýyl sharýashylyǵynyń ornyqtylyǵyn arttyrýǵa jáne agroazyq-túlik júıelerin jańǵyrtýǵa yqpal ete alatyn ózekti quraldar men sheshimderge erekshe nazar aýdarylady.
Aıta keteıik, bıyl qazan aıynda Qazaqstan strategııalyq zertteýler ınstıtýtynyń tapsyrysy boıynsha áleýmettik saýalnama júrgizilgen. Nátıjesi qazaqstandyqtardyń 81,1%-y saıası kýrsqa qoldaý bildiretinin ári eldiń durys baǵytta damyp kele jatqanyna senimdi ekenin kórsetken.
