Jasandy ıntellekt adamnyń jaýapkershiligin almastyrmaýy tıis – Darhan Jazyqbaı
ASTANA. KAZINFORM - Jasandy ıntellekt sheshim qabyldaýǵa kómekteskenimen adamnyń jaýapkershiligin almastyrmaýy tıis. Mundaı pikirdi Jenevada ótip jatqan BUU-nyń Jasandy ıntellektti basqarý jónindegi jahandyq dıalogynda Memlekettik qyzmet isteri agenttiginiń tóraǵasy Darhan Jazyqbaı bildirdi.
«JI salasyndaǵy alshaqtyqtardy eńserý: áleýetti arttyrý, qoljetimdilik jáne tsıfrlyq negizder» atty sessııada sóz sóılegen agenttik tóraǵasy jasandy ıntellekt dáýirinde memlekettik basqarý júıesiniń jańa tehnologııalardy tıimdi ári jaýapty paıdalanýǵa daıyndyǵyna toqtaldy. Onyń aıtýynsha, azamattardyń jasandy ıntellektige degen senimi algorıtmderge emes, memlekettiń sheshimderdi qanshalyqty ádil, ashyq jáne esepti túrde qabyldaıtynyna degen senimnen bastalady.
Sonymen qatar ol Qazaqstannyń naqty tájirıbesi retinde memlekettik qyzmetti tsıfrlyq transformatsııalaý nátıjelerin tanystyrdy.
Búginde e-Qyzmet tsıfrlyq HR-platformasy 80 myńnan astam memlekettik qyzmetshini biriktirip, 400-den astam tsıfrlyq HR-protsesti qamtıdy. Platforma 100-den astam memlekettik aqparattyq júıemen ıntegratsııalanǵan. Memlekettik qyzmetke irikteý konkýrstary tolyqtaı onlaın formatta nebári 5–7 jumys kúni ishinde ótkizilip, ashyq, básekeli ári obektıvti irikteýdi qamtamasyz etedi.
Qazaqstan memlekettik basqarýda Integrity by Design qaǵıdatyn basshylyqqa alady.
Kandıdattardyń anonımdendirilgen derekterin paıdalaný, biryńǵaı baǵalaý júıesi, reıtıngterdiń avtomatty túrde qalyptastyrylýy jáne árbir sheshimniń tsıfrlyq iziniń saqtalýy sýbektıvtilik pen sybaılas jemqorlyq táýekelderin tómendetýge múmkindik beredi.
Qazirgi ýaqytta agenttik kadrlyq derekterdi taldaý kezinde jasandy ıntellekt tehnologııalaryn qoldanyp, boljamdy kadrlyq josparlaý men memlekettik fýnktsııalarǵa aýdıt júrgizý baǵytynda jumys isteýde. Memlekettik sektorda jasandy ıntellektti engizý qoljetimdilik, adamı baqylaý jáne eseptilik qaǵıdattaryna negizdelgen.
- Jasandy ıntellekt sheshim qabyldaýǵa kómektese alady, biraq ol adamnyń jaýapkershiligin almastyrmaýy tıis. Túptep kelgende, másele tehnologııanyń memleketti ózgerte alatynynda emes, memlekettiń osy tehnologııalarǵa qandaı qundylyqtar engizetinde jatyr. Qazaqstan ashyqtyq pen teń múmkindikter qaǵıdatyn ustanady jáne osy baǵyttaǵy tájirıbesimen bólisýge daıyn, – dedi Darhan Jazyqbaı.
Aıta keteıik, atalǵan is-sharada Premer-Mınıstriniń orynbasary — Jasandy ıntellekt jáne tsıfrlyq damý mınıstri Jaslan Mádıev Qazaqstannyń BUU reformalaryn qoldaıtynyn rastap, «tsıfrlyq ult» qurýdaǵy ulttyq tájirıbesimen bólisti.
