«Jasampaz patrıotızm — eldiń negizgi qaǵıdaty»: Jańa adamdar Konstıtýtsııa jobasy týraly
ASTANA. KAZINFORM – Osy jyly Qazaqstan tarıhı mańyzy zor kezeńniń tabaldyryǵynda tur. Elde Konstıtýtsııaǵa ózgerister men tolyqtyrýlar engizý jónindegi referendým ótedi.
Usynylǵan túzetýler aýqymdy ári strategııalyq sıpatqa ıe. Bul eldiń ornyqty damýynyń irgesin qalap, qoǵam men memleket úshin jańa baǵdardy aıqyndaıdy.
Jańa adamdar jalpy jıynynda bul basty taqyryptardyń birine aınaldy. Astanada elimizdiń barlyq óńirinen júzdegen belsendi jınaldy. Azamattyq naýqandardyń kóshbasshylary óz komandalarymen birge atqarǵan jumysyn qorytyndylap, ózekti kún tártibin talqylap, bolashaqqa josparlaryn belgiledi.
Basty nazar — Ádiletti Qazaqstandaǵy azamattyń róline jáne Konstıtýtsııanyń tek quqyqtyq normalardy ǵana emes, sonymen qatar eldiń qundylyqtyq baǵdaryn aıqyndaıtyn qujat retindegi mańyzyna aýdaryldy.
– Qazaqstan Respýblıkasynyń qyzmetiniń negizgi qaǵıdattary týraly aıtylatyn 3-bapqa engiziletin tolyqtyrýlarǵa erekshe toqtalǵym keledi. Onda jasampaz patrıotızm, eńbek, bilim, adam men otbasynyń damýy týraly sóz qozǵalady. Bul normalar eldiń belsendi ári jaýapty azamattarǵa basymdyq beretinin kórsetedi. Jańa adamdar osy qundylyqtar men qaǵıdattardy ilgeriletip keledi. Biz bul Konstıtýtsııalyq ózgeristerdi tolyq qoldaımyz, - dedi Jańa adamdar kóshbasshysy Ásel Badenova.
Aıta keteıik, Májilis depýtaty Aıdarbek Qojanazarov jańa Konstıtýtsııa jobasy Qazaqstannyń tereń ózgerister kezeńindegi memlekettik damý baǵytyn aıqyndaıtyn strategııalyq qujat ekenin málimdedi.
