Jasaǵan isime ókinemin, aıybymdy ishinara moıyndaımyn — Ernar Jıembaı
ShYMKENT. KAZINFORM — Shymkent qalasy ákiminiń orynbasary Rýslan Berdenovke jasalǵan qastandyq isi boıynsha sot protsesinde taraptardyń jaryssózi ótti.
Otyrys barysynda aıyptalýshy Ernar Jıembaı jasaǵan isine ókinetinin jáne aıybyn ishinara moıyndaıtynyn málimdedi.
— Men istegen isimdi eshqashan durys dep aıta almaımyn. Óskeleń urpaqqa mundaı áreketti qaıtalamaýdy ótinemin. Jábirlenýshi Rýslan Arysbekulynyń otadan keıingi sýretterin kórdim. Shynyn aıtsam júregim aýyryp ketti. Shyn júregimmen keshirim suraımyn, saýyǵyp ketýin tileımin. Alaıda, bul áreketke barýyma sotta aıtqan ózimniń jaýabymda turamyn. Quran ustaýǵa, detektor bolsa oǵan da daıynmyn, — dedi aıyptalýshy.
Onyń aıtýynsha, qylmys jasaǵan sátte adam óltirý nıeti bolmaǵan.
— Qazir temir tordyń ishindemin. Ókinemin. Meniń kisi óltirý pıǵylym eshqashan bolmaǵan. Muny dáleldeıtin beınejazbalar da bar. Eger óltirý nıetim bolsa, ol qulaǵan kezde artynan baryp áreket jasar edim nemese kólikke otyryp qashyp keter edim. Biraq ondaı qadamǵa barǵan joqpyn. Meniń oıym tek qorqytý edi, — dedi aıyptalýshy.
Jıembaıdyń sózinshe, jábirlenýshiniń jaǵdaıy bastapqyda asa aýyr bolmaǵan.
— Aldyńǵy jaǵynan qan izderi baıqalmady. Jedel járdem qyzmetkerleri de onyń halin ortasha dep baǵalady. Shyn máninde, oq tıdi dep oılamadym, — dedi ol sotta.
Aıyptalýshynyń sózinshe, ol jasaǵan áreketi úshin ókinedi jáne sottan ádil sheshim kútedi.
— «Adam óltirý oıymen atqan» degen aıypty moıyndamaımyn. Sebebi, meniń adam óltirý pıǵylym bolǵan joq, densaýlyqqa da aýyr zııan keltirem degen nıetim bolǵan joq. Alaıda belgisiz mán jaılarmen denesine tıip aýyr jaraqat alyp otyr. Maǵan QR QK 25-baby aıaqtalǵan qylmyspen jáne naqty bitken qylmyspen QR QK 106-babymen jaza taǵaıyndaýyńyzdy suraımyn. Barsha elimizdiń azamattarynan keshirim suraımyn, — dedi ol sotta.
Rezonansty is boıynsha aıyptalýshyǵa sońǵy sóz 19 tamyz kúni saǵat 15:00–de beriledi.
Eske sala keteıik, budan buryn prokýror aıyptalýshy Ernar Jıembaıǵa 11 jyl 3 aı bas bostandyǵynan aıyrý jazasyn surap, sondaı-aq jábirlenýshi taraptyń paıdasyna 30 AEK (118 890 teńge) óndirýdi talap etkenin jazǵan bolatynbyz.