«Jasa, Qazaqstan! Jasa, qazaq qyzdary!» - respýblıkalyq basylymdarǵa sholý

ASTANA. 4 aqpan. QazAqparat - Qazaq aqparat agenttigi respýblıkalyq basylymdarda 4 aqpan, juma kúni shyqqan ózekti materıaldarǵa sholýdy usynady.

«Keshe Parlament Senatynyń kezekti plenarlyq otyrysy bolyp ótti. Kún tártibinde Májilis maquldaǵan «Qazaqstan Respýblıkasynyń keıbir konstıtýtsııalyq zańdaryna tolyqtyrýlar men ózgerister engizý týraly» Konstıtýtsııalyq zańnyń jobasy qaraldy. Otyrysty palata Tóraǵasy Qasym-Jomart Toqaev sóz sóılep ashty», - dep jazady «Egemen Qazaqstan» gazeti juma kúngi nómirindegi «Kezekten tys saılaý zańy qoldaý tapty» degen maqalasynda. Depýtattar óz sózderinde Prezıdent Nur­sul­tan Nazarbaevtyń kezekten tys prezıdenttik saılaý ótkizý týraly sheshiminiń oryndylyǵyn tilge tıek etti. Bul qadam Pre­zıdenttiń demokratııalyq prıntsıpterge beriktigin, elimizdiń ta­ǵy bir tarıhı synaqtan súrinbeı ótkendigin kórsetedi. Elbasy Negizgi Zańymyzda kórinis tapqan qundylyqtardy basshylyqqa ala otyryp, qıyn jaǵdaıdan shy­ǵý­dyń ońtaıly jolyn taba alaryn taǵy bir dáleldedi. Osylaısha óz pikirlerin bildirgen senatorlar Májilis ma­qul­daýynan ótken «Qazaqstan Res­pýblıkasynyń keıbir Konstı­tý­tsııalyq zańdaryna tolyqty­rý­lar men ózgerister engizý tý­ra­ly» Qazaqstan Respýblıkasy Kons­tıtýtsııalyq zańyn qabyldady.

Keshe 7-Qysqy Azıada oıyndarynyń aıasynda hokkeıden qyzdar arasynda aqtyq oıyn ótip, onda Qazaqstan quramasy Qytaı komandasyn 4:1 esebimen jeńip, osymen 3 márte Azıada chempıony atandy. Osyǵan oraı «Egemen Qazaqstan» gazetinde «Jasa, Qazaqstan! Jasa, qazaq qyzdary!» degen maqala jarııalandy. «Qazaq ánurany oınalǵanda bári­niń qosylyp shyrqaǵanyn-aı! Jankúıerlerge erkeledi qyz­dar. Olardyń súıkimdi qalpyn, erkeligin búkil qazaq dalasy kóterse de bolady. Sondaı erlik keldi qazaq qyzdarynyń qolynan. 1,5 mıllıard halqy bar Qytaı­dyń quramasy 16 mıllıon halqy bar Qazaqstan quramasynyń al­dynda tize búgip jatsa osyn­daı sózdi qalaı aıtpaýǵa bolady? Ekin­shi oryn Japonııa qurama­syna buıyrdy. Dúnıejúzilik reı­­tıngte Qazaqstan men Japo­nı­ıa­nyń aldynda turǵan Qytaı qura­masy qola medalǵa ıe boldy», dep jazady basylym.

«Aıqyn» gazetiniń jazýynsha, Úkimet jetekshisi Kárim Másimovtiń qatysýymen ótken Eńbek jáne halyqty áleýmettik qorǵaý mınıstrliginiń alqa májilisinde 2010 jyldyń qorytyndysy shyǵarylyp, 2011 jyldyń mindetteri talqylandy. Mınıstrlik 2009-2010 jyldary «Jol kartasy» sheńberinde óńirlik jumyspen qamtý jáne kadrlardy qaıta darlaý strategııasyn júzege asyrý maqsatynda memleket qazynasynan 342,7 mlrd teńge jumsady. Nátıjesinde 9 myń joba aqıqatqa aınalyp, 392 myń jumys orny ashyldy. 150 myń adam daıarlaýdan jáne qaıta daıarlaýdan ótip, 109 myń adam jumyspen qamtyldy. Sóıtip, ótken jyldyń sońynda jumyssyzdyq deńgeıi 5,5 paıyzǵa tómendedi.

Osy basylymda «Aýyl» partııasynyń tóraǵasy Ǵanı Qalıevpen aradaǵy suhbat «Biz - jeńimpaz jaǵyndamyz...» degen taqyryppen berilgen. «Kezekten tys prezıdent saılaýy ótken jaǵdaıda saıası partııalar qalaı áreket etpek, olar saılaý dodasyna daıyn ba?» degen saýaldarǵa tuşymdy jaýap bergen ol: «Qazir másele - saılaýda Prezıdenttiń qaıta saılanatyndyǵynda emes, onan keıin qandaı áleýmettik-ekonomıkalyq, saıası baǵyt qalyptasatyndyǵynda. Eger aýyldy, ǵylymdy, bilimdi damytyp, paraqorlyqpen kúresetin bolsaq, Prezıdenttiń saıasatyn qoldaımyz. Biz «Aýyl» týraly arnaıy memlekettik baǵdarlama qabyldanýy tıis dep esepteımiz», - degen.

***

«Oralmandarǵa sapasyz úı salyp berý sánge aınalǵan ba?». «Alash aınasy» gazetiniń búgingi nómirinde jarııalanǵan maqalada Qyzyljardaǵy «Nurly kósh» baǵdarlamasy boıynsha salynǵan úılerge arzan, sapasyz qurylys materıaldary paıdalanylǵan. Sonyń kesirinen qaqaǵan qysta keıbir úılerdiń qabyrǵalaryna syzat túsken. Bul týraly arnaıy tekseris júrgizgennen keıin oblystyq prokýratýra habarlaǵan. Kináli retinde aýdandyq qurylys bóliminiń bastyǵy Islam Nurǵalıevtiń ústinen qylmystyq is qozǵalyp otyr. «Munda ótken jazda «Nurly kósh» baǵdarlamasy boıynsha bólingen qarjyǵa 140 úı boı kótergen bolatyn. Reseıden, Ózbekstan men Mońǵolııadan jáne Qytaıdan kóship kelgen qandastarymyz qonystepkendi-di. Alǵashynda jańa úı alǵandaryna qýanǵan olar qazir aryzdaryn qushaqtap, ana esikti bir, myna esikti bir syǵalaýmen júr. Sebep - úılerdiń sapasyz salynǵandyǵy jáne baǵasynyń qymbattyǵy», - dep jazady basylym.

«Alash aınasy» gazetiniń turaqty «Oı-kókpar» aıdarynyń bilikti mamandarǵa baǵyttaǵan búgingi saýaly - «Sybaılas jemqorlyqqa qarsy kúreske jol bermeı otyrǵan lobbısterdi toıtarý múmkin be?». Osy saýalǵa jaýap bergen «Ult taǵdyry» qozǵalysynyń tóraǵasy Dos Kóshim: «Memlekettik qyzmetkerler memlekettiń saıasatyna qoldaý kórsetýi kerek. Bul - dádeldeýdi qajet etpeıtin aksıoma. Qazirgi bizdiń memlekettik saıasatymyzdyń eń negizgileriniń biri - sybaılas jemqorlyqqa qarsy kúres júrgizý. Endeshe, bıliktiń barlyq tarmaǵynda otyrǵan azmattar memlekettiń ustanyp otyrǵan saıastyn júzege asyrýǵa kúsh salýy kerek», - deıdi. Al saıasattanýshy Ázimbaı Ǵalı: «Bizdiń elimiz Táýelsizdik alǵan jyldan bastap naryqtyq qoǵam qurýdy kózdedi. Jáne 2002 jyly Qazaqstandy álem elderi naryqtyq ekonomıkaǵa negizdelgen memleket dep tanydy. Al siz aıtyp otyrǵan lobbısterdiń qoǵamda bolýy - barlyq naryqtyq memleketke tán qubylys. Sondyqtan lobbısterdi toıtarý, olarmen kúres qashan da ońaı jumys bolmaǵan jáne bolmaıdy da», - dep jaýap qatqan.

***

Memleket basshysy Nursultan Nazarbaevtyń referendým ótkizýden bas tartyp, kezekten tys Prezıdenttik saılaý ótkizý týraly sheshimi qoǵam arasynda tyń serpilis týǵyzdy. Osyǵan oraı elimizdiń qoǵam qaıratkerlerimen qatar sheteldik bilikti mamandar da óz pikirlerin bildirýde. Solardyń birqatary «Kazahstanskaıa pravda» gazetiniń juma kúngi nómirinde jarııalanyp otyr. Máselen, Ulybrıtanııanyń EO isteri jónindegi mınıstri Devıd Lıdıngton: «Konstıtýtsııalyq keńestiń referendýmdy ótkizýden bas tartyp otyrǵanyna baılanysty men Prezıdent Nazarbaevtyń prezıdenttik saılaýdy ústimizdegi jyldyń aıaǵyna deıin ótkizý týraly sheshimin qoldaımyn. Bul Qazaqstannyń demokratııalyq baǵytqa jaqyndyǵynyń taǵy bir kórinisi bolyp tabylady. Qazaqstan bıligi saılaýdy qabyldanǵan halyqaralyq standarttarǵa saı ótkizýdi qamtamasyz etýde bizdiń qoldaýymyzǵa úmit arta berýine bolady», - dep atap ótken. Al AQSh Memlekettik hatshysynyń jurtshylyqpen jáne baspasózben baılanystar jónindegi kómekshisi Fılıp Kroýlı: «Biz Qazaqstan Úkimetiniń ulttyq referendým ótkizbeý týraly sheshim qabyldaǵanyn bilemiz jáne de biz muny Qazaqstannyń oń sheshimi boldy dep oılaımyz», - depti.