Jas jubaılar toıda túsken aqshanyń 15 paıyzyn salyq organdarymen bólisýge mindetteledi - BAQ-qa sholý
***
Keshe Memleket basshysy Nursultan Nazarbaev Almatydaǵy rezıdentsııasynda Qazaqstan Respýblıkasy Ulttyq Bankiniń 2012 jylǵy esebin qaraýǵa arnalǵan keńes ótkizdi. «Egemen Qazaqstan» gazetiniń senbilik sanynda «Bul - qarjylyq turaqsyzdyq jaǵdaıynda ornyqty kórsetkish» degen taqyryppen berilgen aqparatqa qaraǵanda, keńeske Prezıdent Ákimshiliginiń Basshysy K.Másimov, Ulttyq Bank tóraǵasy G.Marchenko, Premer-Mınıstrdiń orynbasary Q.Kelimbetov jáne Prezıdent Ákimshiligi Basshysynyń orynbasary B.Sultanov qatysty. «Ulttyq Banktiń qyzmeti týraly dástúrli jyldyq esepti qaraı kele, biz búginde el damýynyń barlyq makroekonomıkalyq kórsetkishteri qalypty mólsherde ekenin kórip otyrmyz. Álemde qarjylyq turaqsyzdyq oryn alyp otyrǵanda, ekonomıka ósimi 6 paıyz bolǵanyn ornyqty kórsetkish dep sanaýǵa bolady. Inflıatsııa belgilengen shekten asqan joq, ulttyq valıýta baǵamy turaqty deńgeıde, al ekonomıkany kredıtteý jáne bankterdi kapıtaldandyrý artýda», - dedi Memleket basshysy.
«Keshe Aqordada Memlekettik hatshy Marat Tájınniń tóraǵalyq etýimen respýblıkalyq jáne jergilikti memlekettik organdardyń etnosaralyq qarym-qatynas máselelerine qatysy bar qyzmetkerlerine arnalǵan keńes bolyp ótti», - dep jazady «Egemen Qazaqstan» gazeti senbilik sanyndaǵy «Ár azamat Otan aldyndaǵy óz jaýapkershiligin sezinýi kerek» degen taqyryptaǵy maqalasynda. Basylymnyń atap ótýinshe, Memlekettik hatshy jas otandastarymyzdyń boıyna patrıottyq tárbıe egý máselesi mańyzdy memlekettik mindetterdiń biri bolyp tabylatynyn kóldeneń tartty. «Búgingi kúni búkil álemde údeı túsken áleýmettik shıelenister, órkenıet qundylyqtarynyń daǵdarysy, álemdik jańa turaqsyzdyq sııaqty qaýipter bizge de oı salýy kerek. Sondyqtan da patrıottyq tárbıege degen pragmatıkalyq jáne realıstik jańa kózqaras qalyptastyrý, árbir azamatqa ómir súrýdiń teń múmkindikterin berý aldymyzda turǵan basty mindetter», - dedi ol.
***
«Aıqyn» gazetiniń jazýynsha, senimdi derek kózderine qaraǵanda dúısenbi kúni qoldanystaǵy «Qazaqstan Respýblıkasy neke jáne otbasy týraly» Zańyna tolyqtyrýlar men ózgerister engiziletin kórinedi. Aldyn ala alynǵan málimetterge sener bolsaq, jańa baptardyń birqatary elimizdiń turǵyndary úshin múlde tańsyq. Óıtkeni ómirdiń ózi májbúr etip otyrǵan jaǵdaılar qatarynda qazaqtardyń ulan-asyr toı ótkizý rásimderi de bar. Bul jaıynda «Toıǵa da salyq salynady» degen taqyryptaǵy aqparatta keńinen baıandalǵan. «Máselen, 9-baptyń 7-bólimi boıynsha endigi jerde quda túsip, qyz uzatýdan bastap dúrildetip úılený toıyn ótkizgenińiz úshin memleketke salyq tóleýge tıistisiz. Jumsalatyn qarajat tek kassa arqyly eseptelip, toıdan túsken tabystyń 15 paıyzyn salyq organdaryna tapsyrýǵa mindettisiz», dep jazady basylym.
Baıqońyr qalasynda «Baıqońyr» kesheni boıynsha Qazaqstan - Reseı úkimetaralyq komıssııasynyń birinshi jıyny ótti. Oǵan Qazaqstan Respýblıkasy Premer-Mınıstriniń orynbasary Qaırat Kelimbetov pen Reseı Federatsııasy Úkimeti tóraǵasynyń birinshi orynbasary Igor Shývalov tóraǵalyq etti. Osy jıyn arqaý bolǵan maqala «Aıqyn» gazetinde «Baıqońyrǵa qatysty eshqandaı kelispeýshilik joq» degen taqyryppen berildi. Basylymnyń jazýynsha, jalpy otyrysty qorytyndylaı kelip, «Baıqońyr» kesheni boıynsha úkimetaralyq komıssııanyń teń tóraǵalary Reseı Federatsııasy Úkimeti tóraǵasynyń birinshi orynbasary Igor Shývalov pen Qazaqstan Respýblıkasy Premer-Mınıstriniń orynbasary Qaırat Kelimbetov «Baıqońyr» kesheni boıynsha úkimetaralyq komıssııanyń birinshi otyrysynyń hattamasyn kelisti. Úkimetaralyq komıssııa basshylary atap ótkendeı, onyń kún tártibindegi barlyq máseleler qaraldy. Taraptar «Baıqońyr» keshenin jaldaý shartynda Reseı men Qazaqstannyń múddesin eskere otyryp, «Baıqońyr» kesheni boıynsha sharttyq-quqyqtyq bazany jetildirý qajettigin qýattady.
***
«Alash aınasy» gazetiniń «Dat» aıdarynda rejısser, Qazaqstannyń eńbek sińirgen ártisi Murat Ahmanovpen aradaǵy «Qazir qazaq balalary óz tilin bilmese, biz ony anasynan kórýimiz kerek» degen taqyryppen berilgen. Armanda ketken Alash arystarynyń taǵdyry, jalpy, repressııa máselesi áli kúnge shyndyǵy ashyla qoımaǵan tarıhı taqyryp. Osy taqyrypqa teatr kózqarasymen qarap, dramatýrg Iran-Ǵaıyptyń "Fatıma" atty qoıylymyn qoıǵan rejısser suhbat barysynda: «Fatıma» sahnaǵa qoıylǵanǵa deıin bir jarym jyldaı meniń qolymda júrdi. Sebebi, siz aıtqandaı, repressııa, Alash taqyryby - jaı, ústirt qaraı salatyn dúnıe emes, ol kádimgideı rýhanı daıyndyqty, bilim men tarıhı tanymdy qajet etetin tarıhymyzdyń úlken bir salasy. Pesa avtory Iran-Ǵaıyp aǵamyz ony sonshalyq keremet jazyp shyqqan. Ol kisiniń oıy tereń ekenin bilesizder, ár sóziniń astaryn ashý úshin qanshama áreket jasap, qanshama ter tógý qajet. Áıtpese sol zamannyń atmosferasy, bolyp jatqan oqıǵalardyń máni túgel ashylmaı qalady», - deıdi.
