Jas jıhankez Laýra Dekker álemdik saıahatqa attandy
ASTANA. Tamyzdyń 23-i. QazAqparat - Gollandııalyq 14 jasar jas jıhankez Laýra Dekker senbi kúni jalǵyz ózi álemdik saıahatqa attandy. Bul týraly Laýra týraly fılm túsirý quqyǵyna ıe bolyp otyrǵan gollandııalyq «Masmedıa» telekompanııasynyń ókilderi habarlady.
Jas jıhankez Portýgalııanyń Portıman qalasynyń aılaǵynan jolǵa shyqty. Dekker osy jerden Ońtústik Amerıka jaǵalaýyna attanady, ol jolda birneshe ret Kanar araldaryna aıaldamaq. Laýra mingen «Gýppı» ıahtasynyń joly ári qaraı Gran-Kanarııa aralynan Barbadosqa deıin jalǵasady. Odan keıin jas jıhankez Kishi Antıl araldaryna aıaldap, qoryn tolyqtyrady jáne Panam arnasy arqyly Tynyq muhıttyń sýyna shyǵady. Galapagos araldarynan Markız araldaryna deıingi aralyqta, odan keıin Markız araldarynan Avstralııa jaǵalaýyna deıingi aralyqty baǵyndyrǵannnan keıin, «Gýppı» ári qaraı Shrı-Lankaǵa bet alady. Odan keıingi Sýdanǵa bet alatyn Laýra, odan keıin Qyzyl teńizge jáne Sýetsk arnasy arqyly Jerorta teńizine shyqpaq.
Jer sharyn aınalyp shyǵyp, eń jas teńizshi atanǵysy keletin gollandııalyq Laýra Dekkerge saıahatqa shyǵýǵa sot jaqynda ǵana ruqsat berdi. Byltyr sot jas jıhankezdiń muhıtta jalǵyz júzýine tyıym salyp, ony memlekettik áleýmettik qyzmetterdiń qamqoryna ýaqytsha ornalastyrǵan edi.
Laýranyń Jer sharyn aınalyp shyqqan eń jas ıahtashy ataný úshin óziniń segizmetrlik «Gýppı» ıahtasyn sýǵa túsirýdi armandaǵanyna biraz ýaqyt bolyp qaldy. Qazirgi ýaqytta bul rekord aǵymdaǵy jyldyń mamyr aıynda jer sharyn jalǵyz aınalyp shyqqan 16 jasar Djekssıka Ýotsonnyń ýysynda.
Jas teńizshi atanýdy armandaǵan Laýra Dekker 2009 jyldyń jeltoqsan aıynda sot qaýlysyn buzyp, Gollandııalyq Antıl araldaryna qashyp ketken edi. Ol sol jerden úıine qaıtaryldy. Al jaqynda Mıddelbýrg qalasynyń soty 14 jasar jıhankezge jalǵyz júzýge salǵan tyıymdaryn alyp tastady. Laýra Dekker, ata-anasy jer sharyn aınala jetijyldyq saıahat jasap júrgen kezde, Jańa Zelandııa jaǵalaýynda ıahtada dúnıege kelipti. Ol óziniń alǵashqy ıahtasyna 6 jasynda qol jetkizgen jáne 10 jasynan bastap jalǵyz ózi júze bastaǵan.
