Jas jigittiń qos búıregin ruqsatsyz alý deregi boıynsha sot aldy tergeý bastaldy
AQTÓBE. QazAqparat - Aqtóbe oblystyq ishki ister departamenti qaza bolǵan Serikbolsyn Kósherbaıdyń búıregin alý deregi boıynsha sot aldy tergeý jumysyn bastady, dep habarlaıdy QazAqparat tilshisi.
«Aqtóbe oblystyq ishki ister departamenti Qylmystyq kodekstiń «Adam máıitiniń aǵzalary men tinderin zańsyz alyp qoıý» baby boıynsha sot aldy tergeý jumystaryn bastady. Qazirgi ýaqytta keshendi tergeý júrip jatyr»,- dep habarlady oblystyq ІІD baspasóz qyzmeti.
Aıta keteıik, Serikbolsyn Kósherbaıdyń ólimine qatysy bar Baıǵanın aýdanynyń turǵyny sot sanktsııasymen qamaýǵa alyndy. Bul oqıǵa boıynsha Qylmystyq kodekstiń «Densaýlyqqa qasaqana aýyr zııan keltirý» baby boıynsha sot aldy tergeý bastaldy. Eger kúdiktiniń qylmysy dáleldense ol 8 jyldan 12 jylǵa deıin bas bostandyǵynan aıyrylýy múmkin.
Buǵan deıin habarlaǵanymyzdaı , aqtóbelik dárigerler 22 jastaǵy jigittiń eki búıregin eki adamǵa esh ruqsatsyz salyp bergen bolatyn.
Bul oqıǵa boıynsha Densaýlyq saqtaý mınıstri Erjan Birtanov óz pikirin bildirgen edi. Sondaı-aq, búgin №2 Aqtóbe qalalyq sotynda marqumnyń qaryndasy Baldáýren Nurbylaevanyń aryzy qaraldy. Osy sot aldy daıyndyqqa donor múshelerin alǵan dárigerler qatyspady .
