Jas jigitti qaǵyp óltirý oqıǵasy: Óskemen ákiminiń isi Ádep keńesinde qaralady
ÓSKEMEN. QazAqparat - Memlekettik qyzmet isteri jáne sybaılas jemqorlyqqa qarsy is-qımyl agenttiginiń ShQO boıynsha departamenti basshysy Janna Qabdoldaqyzy Rıdderdegi kólik apatyna qatysy bar delingen Óskemen qalasynyń ákimi Qýat Tumabaevtyń nelikten qyzmetten ýaqytsha shettetilmegenin túsindirdi, dep habarlaıdy QazAqparat tilshisi.
Eske salsaq, 16 sáýirde Rıdder qalasy ákiminiń orynbasary Baýyrjan Qurmanbaev 19 jastaǵy jigitti qaǵyp óltirdi degen kúdikpen qamaýǵa alynǵany habarlanǵan bolatyn. Keıin qaıǵyly oqıǵaǵa Óskemen qalasynyń ákimi Qýat Tumabaevtyń qatysy bar ekeni málim bolǵan. Degenmen, shahar basshysy óz qyzmetin áli kúnge deıin atqarýda. Oblystyq Ádep jónindegi keńestiń tóraǵasy Janna Qabdoldaqyzy onyń sebebin bylaı dep túsindirdi:
«Oqıǵanyń basty fıgýranty - Baýyrjan Qurmanbaev. Ol Rıdder qalasynyń ákimi qyzmetinen ýaqytsha bosatyldy. Al Qýat Tumabaev iske kýáger retinde tartylǵan. Sot oryndary onyń isine baǵa bermeı turyp, qyzmetinen bosatýǵa negiz joq. Eldiń bul oqıǵaǵa beıjaı qaramaǵanyn eskerip, ákimniń máselesin Ádep keńesinde qaraý týraly sheshim shyǵardyq», - dedi Janna Qabdoldaqyzy.
Ol májilis mamyr aıynyń sońyna deıin ótedi dep josparlanǵan. Vedomstvo 2 sheneýnikke qatysty óz baǵasyn sol májiliste bermek.
«Dál qazir Baýyrjan Qurmanbaev ta, Qýat Tumabaev ta jýrnalısterge eshqandaı málimet bere almaıdy. Olardan isti tergeý barysynda eshqandaı aqparat bermeý týraly qolhat alynǵan», - deıdi departament basshysy.
