Jas jazýshy Baıan Tasqynuly Qytaıdyń Sanmao ádebı syılyǵynyń ıegeri atandy

ASTANA. KAZINFORM – Qytaıda turatyn qandasymyz Baıan Tasqynuly Sanmao atyndaǵy prozalyq shyǵarmalar syılyǵynyń «Jas talap» nomıtsııasyna ıe boldy, dep habarlaıdy Kazinform tilshisi NetEase saıtyna silteme jasap.

Ol syılyqqa «Qyran boıynda» atty essesimen usynylyp otyr.

«Qyran boıynda» shyǵarmasynda Baıan Tasqynuly Altaıdyń Lasty aýylynyń Noǵaıty eldi mekeninde ótkergen baqytty balalyq shaǵy týraly syr shertedi, jergilikti halyqtyń turmys-tirshiliginiń kórkem sýretin jasap, zaman talaby týdyrǵan áleýmettik ózgerister týraly oıymen bólisedi.

Baıan Tasqynuly 1999 jyly Altaı qalasynda týǵan, Gýanchjoý ýnıversıteti Qytaı ádebıeti fakýltetiniń túlegi. Ádebıet ólkesine 2021 jyly qadam tastaǵan qytaıtildi jazýshynyń shyǵarmalary «Ulttar ádebıeti», «Ulttyq jınaq», «Batys» sekildi bedeldi basylymdarda jaryq kórgen. «XXI ǵasyr Qytaı prozasynyń antologııasy – 2023» jınaǵyna shyǵarmasy engen. 　

2016 jyly taǵaıyndalǵan Sanmao atyndaǵy prozalyq shyǵarmalar syılyǵy – Qytaıdyń kórkem ádebıet salasyndaǵy tanymal syılyqtardyń biri. Konkýrsqa qytaı tilindegi prozalyq jınaqtar men ashyq jarııalanǵan esse-jazbalar qatysa alady. Syılyqqa usynylatyn týyndylardan rýhanı qundylyqtardy ulyqtaý, zamana ózgerisin kórsetý, poezııalyq máner men kórkemdik boıaýǵa baı bolý talap etedi.

Buǵan deıin habarlanǵandaı, Memlekettik keńesshi Erlan Qarın halyq aǵartý isiniń jáne urpaq tárbıesiniń eń basty kilti – ádebıet ekenin aıtqan boltyn.