Jas volonter: Qoldan kelse jurtshylyqqa kómek kórsetýge tyrysqan abzal

NUR-SULTAN. QazAqparat – «Qazaqstannyń medıtsınalyq volonterleri» birlestiginiń tóraǵasy Abylaıhan Ábdirásh Volonterler jyly kópke kómek qolyn sozyp, mektep oqýshylaryna alǵashqy medıtsınalyq kómek boıynsha sabaq ótkizýdi josparlap otyr, dep habarlaıdy QazAqparat tilshisi.

23 jastaǵy elordadaǵy Medıtsınalyq ýnıversıtetiniń 7-shi kýrs stýdenti 5 jyldan beri volonter. «Paıda oılama, ar oıla» degen Abaıdyń naqylyn keltirgen Abylaıhan qoǵamnyń damýyna úles qosýdy maqsat tutatynyn aıtady.

«Ár adamnyń ómirde maqsaty bolýy kerek. Qolyńyzdan kelse aınalaǵa kómek kórsetýge tyrysqan abzal. Eger qoǵamdaǵy qyzmettiń bári aqyly bolyp ketse, adamı qundylyqtar ekinshi orynǵa ysyryla ma dep qorqam. Biletinimizdi ózimizden keıingi býynǵa úıretip júrsek, adal eńbek etsek, biz óz arymyzdy taza ustaı alamyz degen oıdamyn», - dedi QazAqparat tilshisimen áńgimelesken Abylaıhan Ábdirásh elordada «Birgemiz» respýblıkalyq front-keńsesiniń ashylý saltanatynan keıin.

Jas stýdent ózin erikti emes, volonter dep ataýdy jón kóredi eken.

«Ókinishke qaraı, bizdiń qoǵamda erikti degendi «erikken» sózimen baılanystyra uǵatyn da, aıtyp júrgender de bar. Volonterler jylynda búgin front-keńsemizdi ashyp otyrmyz. Odan bólek qazirgi tańda ártúrli volonterlik uıymdarǵa kishi granttar bólinip jatyr. Búkil Qazaqstan boıynsha 300 myń teńge kóleminde 68 grant bólinedi. Sol granttardy ártúrli volonterler óz salasyna paıdalana alady. Mysaly medıtsına volonterlerine ne qajet? Bizge ártúrli alǵashqy kómektiń qobdıshasynan bastap tanometrge deıin qajet. Biz sondaı kerekti zattardy satyp alyp, halyqqa kómektesip, úlken paıdamyzdy tıgize alamyz», - deıdi ol.

Abylaıhan Ábdirásh jolǵa qoıylǵan stýdenttik kredıt jobasyn paıdaǵa jaratpaq.

«ıAǵnı men belgili bir vakansııa ashyp, bir mektepke baryp alǵashqy medıtsınalyq kómekti sabaq retinde ótkize alamyn. Ol baǵdarlama 20 nemese 50 saǵattyq bolýy múmkin. Maǵan volonterler kelip, birge jumys isteýge nıet bildirse, men ony qabyldap alyp, ol menimen birge ártúrli mektepte volonterlik qyzmetin júrgize alady. Seriktesimniń tıisinshe shákirtaqysyna qosyp aqsha tóleýge bolady. Bir volonter jylyna 70 saǵattyq stýdenttik kredıtin óteı alady. Menińshe, elimizde volonterler kóp. Tipti olar ózderiniń volonter ekenin bilmeýi de múmkin. Sebebi biz qazaq degen bir-birine kómek qolyn sozýǵa daıyn turatyn, asarlatyp úlken is tyndyratyn halyqpyz», - deıdi ol.

Aıta ketsek, elordada Prezıdent Qasym-Jomart Toqaev elordada EKSPO kórmesiniń «Art Hub» pavılonynda ornalasqan volonterlerdiń «Birgemiz» respýblıkalyq front-keńsesiniń ashylý saltanatyna qatysty. Front-keńse búkil Qazaqstannyń volonterleri úshin keńes berý, ádistemelik, oqytý jáne aqparattyq ortalyqqa aınalatyn bolady. Sondaı-aq, ol volonterlik jobalar men oqytý baǵdarlamalaryn úılestirý, monıtorıng jasaý, volonterlikti ilgeriletý boıynsha biryńǵaı aqparattyq saıasatty júrgizedi jáne biryńǵaı Call-ortalyqtyń jumysyn uıymdastyrady.