Jas ustazdar arasynda «Men Táýelsizdik qurdasymyn!» chellendji jarııalandy
ASTANA.KAZINFORM - Táýelsizdik kúni qarsańynda elimiz boıynsha 10-16 jeltoqsan aralyǵynda jas ustazdar arasynda ««Men Táýelsizdik qurdasymyn!» respýblıkalyq chellendji uıymdastyrylyp jatyr. Bul týraly Oqý-aǵartý mınıstrligi habarlady.
Áleýmettik jeliler arqyly ótetin bul chellendjdiń basty ıdeıasy – qoǵamda pedagog mártebesin, onyń eńbeginiń mańyzyn jáne ult bolashaǵyn qalyptastyrýdaǵy rólin keńinen nasıhattaý.
Chellendjge qatysýshy muǵalimder áleýmettik jelilerde «Men Táýelsizdik qurdasymyn» taqyrybynda beınerolık nemese post jarııalap, táýelsizdikpen birge ósken urpaq retinde bilim salasynyń damýy men oǵan qosqan óz úlesi, pedagog mıssııasy týraly oı-pikirimen bólisedi.
Chellendjge táýelsizdikpen qurdas nıet bildirýshi ustazdar qatysady, ol úshin:
- áleýmettik jelilerde #MenUstazbyn#TáýelsizdikQurdasymyn #ıAÝchıtel #ıARovesnıkNezavısımostı heshtegterimen foto, beıne posttaryn jarııalańyz;
-táýelsizdik týraly óz oıyńyzben, ustazdyq qyzmettegi mıssııańyzben bólisińiz.
A.Baıtursynuly atyndaǵy «Taldaý» ulttyq zertteýler jáne bilimdi baǵalaý ortalyǵynyń derekterine sáıkes, búginde elimizdiń bilim berý uıymdarynda 15 myńnan astam táýelsizdikpen qurdas pedagog eńbek etedi.
Aıta keteıik, elimizdiń úzdik ustazdary mektepterge tálimgerlik etedi.