Jas urpaqtyń jan-jaqty bilimdi bolýy mańyzdy - Almaty qalasynyń ákimi
; ALMATY. Maýsymnyń 1-i. QazAqparat /Názıra Eleýhan/ - Búgingi ósip kele jatqan jas urpaq básekelestik álem jaǵdaıynda bilim jaǵynan aldyńǵy qatarly elderdiń deńgeıinde bolýy úshin jan-jaqty bilimdi bolýy mańyzdy. Bul týraly búgin Almatyda Ortalyq demalys saıabaǵynda Balalardy qorǵaýdyń halyqaralyq kúnine arnalǵan merekeniń ashylý saltanatynda qala ákimi Ahmetjan Esimov aıtty,
dep habarlaıdy QazAqparat.
Qala basshysynyń aıtýynsha, bala - ata-ananyń baqyty, elimizdiń bolashaǵy, sondyqtan Úkimet jas urpaq tárbıesine erekshe kóńil bóledi. Bul úshin az jumystar atqarylyp jatqan joq: balalarbaqshasy men mektepter, sport klýbtary men demalys oryndary salynyp jatyr. "Búgin jazdyń alǵashqy kúni jáne mektep demalysynyń bastalýy, sondyqtan barlyqtaryńyzǵa jazǵy demalysty jaqsy ótkizýlerińizge tilektespin. Jańa oqý jylyna jańa kúsh jınap kelińizder", dedi ákim.
Merekelik shara sherýmen bastalyp, dástúrli «Balǵyn balalyq shaq» atty balalar shyǵarmashylyǵynyń festıvalimen ashyldy. Odan keıin, Memlekettik qýyrshaq teatrynyń ártisteri óner kórsetti. Mereke ary qaraı, «Azıada-2011» jáne «Balalar eńbegine jol joq» atty asfaltta sýret salý baıqaýlarymen jalǵasty. A.Qasteev atyndaǵy kórkemsýret mektebiniń oqýshylary kórermenderge ózderiniń shyǵarmashylyq jumystaryn usyndy. Sonymen qatar, park alańdarynda salaýatty ómir saltyn nasıhattaýǵa arnalǵan "Qazaqstannyń balalary sportty tańdaıdy" atty aktsııa ótti. Balalar men jasóspirimderdi sportpen aınalysýǵa shaqyratyn aktsııa barysynda otbasylyq estafeta, "Er Tóstik" atty spartakıada, sporttyq mektep oqýshylarynyń kórsetilimderi, aýla klýbtary arasynda breık-dansıng, street-bol jáne basketboldan týrnırler ótti. Sondaı-aq, saıabaqta «Meıirim» jáne "Boztorǵaı" baıqaýy jeńimpazdarynyń gala-kontserti ótýde. Kontsert keshke deıin jalǵasady.
Merekeniń barlyq jas qonaqtaryna tegin balmuzdaqtar men sýsyndar berildi. Olar úshin búgin qala kınoteatrlarynda mýltfılmderdiń, sonymen qatar, kórkem jáne derekti fılmderdiń kórsetilimderi uıymdastyrylatyn bolady. Al, balalar úıinde jáne ınternat mekemelerinde tárbıelenýshi balalar qalalyq haıýanattar parkin, tsırktegi qoıylymdy tamashalap, demalys oryndary men otbasylyq oıyn-saýyq ortalyqtarynda ótetin qaıyrymdylyq sharalarǵa qatysatyn bolady.
Búgin osy syndy merekelik sharalar Almaty qalasynyń barlyq aýdandarynda ótýde. Atalmysh sharaǵa oraı, 7 jastan 14 jasqa deıingi balalar úshin qoǵamdyq kólikterge tegin jol júrý de qamtamasyz etildi.
