«Jas ulanǵa» qabyldaý úshin 1,2 mln teńge para alǵan mektep qyzmetkerleri ustaldy

NUR-SULTAN. QazAqparat - Almatydaǵy B.Momyshuly atyndaǵy «Jas ulan» respýblıkalyq mektebiniń laýazymdy tulǵalary zańsyz qarajat alý kúdigine ilindi. Bul týraly QR Sybaılas jemqorlyqqa qarsy is-qımyl agenttigi 1-shi departamenttiń asa mańyzdy ister jónindegi tergeýshisi Qaısar Barjaqsynov aıtty, dep habarlaıdy QazAqparat tilshisi.

«Almaty qalalyq sybaılas jemqorlyqqa qarsy qyzmeti B.Momyshuly atyndaǵy «Jas ulan» respýblıkalyq mektebiniń laýazymdy tulǵalaryn talapkerdi oqýǵa qabyldaý úshin 1,2 mln teńge somasyndaǵy qarajatty zańsyz alý kúdigi boıynsha áshkereledi», - dedi Qaısar Barjaqsynov.

Onyń atap ótýinshe, atalǵan tulǵalar qylmys jasaǵandyqtaryn tolyq moıyndaǵan.

«Qazirgi tańda qylmystyq is tergeý satysynda, basqa jaǵdaı tergeý múddesi úshin jarııalanbaıdy. QR QPK 201-babyna sáıkes ózge aqparat tergeý múddesi úshin jarııalaýǵa jatpaıdy», - dedi ol.