«Jas ulan» respýblıkalyq mektebiniń 41 túlegi úlken ómirge joldama aldy
ASTANA. 7 maýsym. QazAqparat - Búgin Elordadaǵy «Otan qorǵaýshylary» monýmenti janyndaǵy alańda armııa generaly S.Nurmaǵambetov atyndaǵy «Jas ulan» respýblıkalyq mektebiniń 10-ynshy túlekteriniń saltanatty bitirý rásimi ótti. Mektepti bitirip, úlken ómirge qanat qaqqan bıylǵy tárbıelenýshilerdiń sany -
41, dep habarlady QR Qorǵanys mınıstrliginiń baspasóz qyzmeti.
Ulandar «Otan qorǵaýshylary» monýmentine gúl shoqtaryn qoıdy. Olarǵa saltanatty jaǵdaıda, kóptegen meımandar men dostarynyń qatysýymen dıplomdar tabys etildi.
Mekteptiń bıylǵy bitirýshileri Ulttyq biryńǵaı testte joǵary nátıjelerge jetip otyr. Olardyń ortasha kórsetkishi 89,5 balldy quraıdy.
Alǵashqy ulandar bilim ordasyn 2002 jylǵy maýsymda bitirip shyqqan bolatyn. Mektep 2002-2011 jyldar aralyǵynda 475 túlekti qanattandyrdy. Olardyń 80 paıyzy Qazaqstan Respýblıkasynyń, Reseı Federatsııasynyń, Belarýs Respýblıkasynyń, Germanııa men Túrkııanyń joǵary áskerı oqý oryndarynda bilim alýda.
Bolashaq Otan qorǵaýshylaryna Qazaqstan Respýblıkasy Parlamenti Májilisiniń depýtattary, Astana qalalyq jáne Sararqa aýdandyq ákimdikteriniń ókilderi, Uly Otan soǵysynyń, Qarýly Kúshterdiń ardagerleri jáne jaýynger ınternatsıonalıster sát sapar tiledi.
Jarǵysyna sáıkes orta jalpy bilim beretin memlekettik jáne shet tilderin, áskerı tártip pen dene tárbıesi daıyndyǵyn tereńdetip oqytatyn mektep bolyp tabylady. Bul jerde 420 tárbıelenýshini oqytý josparlanǵan.
Qazaqstan Respýblıkasynyń Qorǵanys mınıstri Ádilbek Jaqsybekov mekteptiń materıaldyq-tehnıkalyq bazasyn jańartýǵa udaıy nazar aýdaryp otyrady. Bul oqýshylardyń laıyqty bilim alyp, zamanýaı tehnıkalardy saýatty meńgerýine múmkindik týdyrady.
Bitirýshiler shaǵyn alańda sap túzep ótýmen ǵana shektelgen joq. Vals bılep, saltanattyń sánin de keltirdi. Qalyptasqan ıgi dástúr boıynsha kókke aq ulpa armandaryna oralǵan aq kógershinder ushyrdy.
Dıplom tapsyrý saltanatynan soń 68665 áskerı bólimi qurmetti qaraýyl rotasynyń shaǵyn eseptoby jeke qarýmen defıle kórsetti.
