«Jas ulan» mektebiniń túlekteri UBT tapsyrý kezinde joǵary nátıjeler kórsetti
ASTANA. 10 maýsym. QazAqparat - Astanada armııa generaly Saǵadat Nurmaǵambetov atyndaǵy respýblıkalyq «Jas ulan» mektebin bitirýshilerdiń oqý ornymen qoshtasý saltanaty bolyp ótti. Saltanatty rásimge Qazaqstan Respýblıkasy Qorǵanys mınıstrligi Bilim jáne ǵylym departamenti basshylyǵynyń ókilderi, ulandardyń ata-analary, Qarýly Kúshter ardagerleri qatysty.
«2013 jylǵy túlekter UBT tapsyrý kezinde joǵary nátıjeler kórsetti. Ortasha kórsetkish 82 baldy qurady. Bul kórsetkish respýblıkanyń basqa áskerı mektepterimen salystyrǵanda joǵary deńgeıde ekendigin atap ótken jón»,-dep habarlady atalǵan vedomstvonyń baspasóz qyzmetinen.
Bıyl respýblıkalyq «Jas ulan» mektebin 55 tárbıelenýshi bitirdi. Olardyń 45-i joǵary áskerı oqý oryndaryna barýǵa sheshim qabyldady. Bul kórsetkish mektep basshylyǵy men oqytýshylar quramynyń áskerı-kásibı baǵytta balalarǵa bilim berýdegi ózderiniń negizgi tapsyrmalaryn laıyqty deńgeıde oryndap otyrǵandyǵyna negiz bolady.
«Mektep tárbıe jumysynyń negizgi maqsaty - ulandardyń Otanǵa degen súıispenshiligin oıatý, olardyń sanasyna qazaqstandyq patrıotızm men elge halyqqa degen adaldyq sezimin sińirý bolyp tabylady. Ulandarymyzdyń óz ómirleri men taǵdyrlaryn armııamen baılanystyrǵylary keletin umtylystaryn kórip, biz naǵyz Otan qoǵaýshylaryn tárbıeleýdemiz dep nyq senimmen aıta alamyz» ,- dedi QR Qorǵanys mınıstrligi Bilim jáne ǵylym departamentiniń bastyǵy general-maıor Edil Orazov.
Mektep bitirýshilerdiń oqý ornymen qoshtasý saltanatyn respýblıkalyq mekteptiń bastyǵy Marat Botın ótkizdi. Ol mektep bitirýshi túlekterge tańdaǵan oqý oryndaryna túsip, «Jas ulan» mektebinde alǵan bilimderi men daǵdylaryn joǵary oqý ornynda tıimdi paıdalana bilýge tilek bildirdi.
Qurmetti qonaqtarmen birge saltanatqa memlekettik avıatsııalyq ortalyqtyń bas dırektory general-maıor Jıentaı Sandybaev ta qatysty. Atalǵan ortalyqtyń kómegimen «Jas ulan» mektebiniń kóptegen oqýshylary ushý sheberliginiń qyr-syrlarymen tanysqandyǵy shyndyq. Bul olardyń Áýe qorǵanysy kúshteri áskerı oqý oryndaryn tańdaýlaryna sebep bolǵandyǵy da jasyryn emes.
Saltanatty rásimnen keıin Respýblıkalyq Gvardııanyń qurmetti qaraýyl rotasy men «Jas ulan» mektebiniń barabanshylar rotasy jurtshylyqqa óz ónerlerin kórsetti.
