«Jas ulan» mektebine jańadan qabyldanǵan ulandar saltanatty túrde ant qabyldady (FOTO)

ASTANA. QazAqparat - Búgin Astanada Armııa generaly Saǵadat Nurmaǵambetov atyndaǵy «Jas ulan» respýblıkalyq mektebine jańadan qabyldanǵan ulandar saltanatty túrde ant qabyldady.

Sharaǵa qatysqan QR Qorǵanys mınıstriniń orynbasary Talǵat Muhtarov, bıyl elimizdiń biregeı oqý orny - «Jas ulan» respýblıkalyq mektebine 15 jyl tolyp otyrǵandyǵyn erekshe atap ótti. 1999 jyly dál osy kúni Memleket basshysy - Qarýly Kúshterdiń Joǵarǵy Bas qolbasshysy Nursultan Nazarbaevtyń qatysýmen mekteptiń ashylý rásimi ótken bolatyn.

«Osy ýaqyt aralyǵynda munda kóptegen jańa dástúrler qalyptasyp úlgerdi. Mektep túlekteri Qarýly Kúshtermizdiń qataryn tolyqtyryp keledi jáne óz eline abyroımen qyzmet etýde», - dedi ol jıyn barysynda.

«Qurmetti ulandar, búgin sizderdiń ómirlerińde jańa kezeń bastaldy, ulan antyn qabyldadyńyzdyr. Sizder «Jas Nurmaǵambetov» ataǵyn asqan maqtanyshpen jáne elimizdiń namysyn adaldyqpen qorǵaıdy dep senemin!», - dep túıdi sózin vıtse-mınıstr.

15 jylda shamamen 650-ge jýyq túlek túlep ushty. Al olardyń aldy búginde maıor shenin alyp úlgergen. Qazir «Jas Ulan» mektebinde 454 tárbıelenýshi bilim alýda.