«Jas ulan» mektebine talapkerlerdi qabyldaý erejesine ózgerister engizildi
ASTANA. QazAqparat - Dál qazirgi sát - «Jas ulan» respýblıkalyq mektebiniń qabyldaý komıssııasynyń jumysy qyzǵan shaq. Áskerı mektep 80 talapkerdi oqýǵa qabyldaýǵa daıyn. Osy ýaqytqa deıin 7-synypty bitirgen balalar qabyldanyp kelse, endi jańa erejege sáıkes «Jas ulan» mektebine jalpy bilim berý mektepteriniń 9-synybyn bitirip, negizgi orta bilim týraly kýálik alǵan jastar túse alady.
Osylaısha mektep tárbıelenýshileriniń quramyn jaqsartý josparlanýda. «9-synypty bitirgen jasóspirim óz betinshe tańdaý jasaıdy, sanaly túrde óz ómirin áskerı qyzmetshi kásibimen baılanystyrǵysy kelgen jastar áskerı mektepke túsedi», delingen QR QM Bilim jáne ǵylym departamentiniń túsindirmesinde.
Qazir Qazaqstannyń túrli óńirlerinen Astanaǵa ata-analarymen kelgen balalar kásibı-psıhologııalyq irikteýden ótýde. Psıhologııalyq testileýden soń olar dene daıarlyǵy men medıtsınalyq kýálandyrýdan sátti ótýi qajet. Bul sońǵy qorytyndy irikteýden ótýge múmkindik beredi. Úsh kezeńniń nátıjeleri men negizgi orta bilimi týraly kýáliktiń ortasha upaıyna sáıkes qabyldaý komıssııasy oqýǵa qabyldaý týraly sheshim shyǵarady.
Sonymen birge qabyldaý komıssııasy balalardyń ata-analarymen rejımge, oqý úderisi jáne oqytý baǵdarlamasyna, áskerı mekteptegi oqýdan keıingi múmkindikteri men keleshegine qatysty jumystar júrgizedi.
«Jas ulan» respýblıkalyq mektebi - memlekettik tildi jáne shet tilderin, áskerı tártipti tereńdetip oqytatyn jalpy orta bilim berý baǵdarlamasy boıynsha, sondaı-aq kúsheıtilgen dene daıarlyǵyn iske asyratyn áskerı oqý orny ekenin atap ótken jón.
Bul mektepten ol qurylǵan sátten bastap búgingi kúnge deıin 13 lek ulandyqtar túlep ushty. Búgingi kúni olardyń barlyǵy Qurlyq áskerleriniń áskerı ınstıtýtynda, eki márte Keńes Odaǵynyń batyry Talǵat Begeldınov atyndaǵy Áýe qorǵanysy kúshteri áskerı ınstıtýtynda, Radıoelektronıka jáne baılanys áskerı-ınjenerlik ınstıtýtynda bilim alýda. Sondaı-aq QR UQK, TJM jáne ІІM joǵarǵy oqý oryndarynyń jáne Reseı, Belarýs, Qytaı, Ýkraına, Túrkııa jáne Germanııa elderiniń Qorǵanys mınıstrlikterindegi joǵarǵy áskerı oqý oryndarynyń kýrsanttary bolyp tabylady.
