«Jas ulan» mektebi tárbıelenýshilerine arnalǵan Jańa jyldyq shyrsha Astanada ótti (FOTO)
Saltanatty shara 15 jyldan beri jyl saıyn dástúrli túrde ótkizilip keledi. Bıyl jańa jyldyq shyrsha astanalyq «Dýman» oıyn-saýyq ortalyǵynda uıymdastyryldy, dep habarlaıdy QR Qorǵanys mınıstrliginiń baspasóz qyzmeti.
Sharaǵa 7 synyptyń 144 ulany (olardyń otyzǵa jýyǵy qamqorlyqtaǵy balalar jáne balalar úıiniń tárbıelenýshileri bolyp tabylady) jáne Astana qalasyndaǵy mektepter men lıtseılerdiń 6-7 synyptarynda oqıtyn oqýshy qyzdar qatysty. Ulandardy kele jatqan Jańa jylmen quttyqtaǵan Qorǵanys mınıstriniń orynbasary general-maıor Talǵat Muhtarov: «Sender mártebeli mamandyqty tańdadyńdar jáne Elbasy - Qarýly Kúshterdiń Joǵarǵy Bas qolbasshysynyń bastamasymen qurylǵan dańqty batyr armııa generaly Saǵadat Nurmaǵambetovtyń esimin ıelengen mektepte oqısyńdar. Bul senderge úlken ári joǵary jaýapkershilik júkteıdi. Ózderińniń barlyq ómir joldaryńda osy jaýapkershilikti laıyqty alyp júretinderińe senimdimin. Senderge 2015 jyly zor densaýlyq, ozat oqý men jigerlilik tileımin. Joldaryń árqashan abyroı men dańqqa bólensin! Jańa jyldaryńmen!» - dedi. Áskerı mektep tárbıelenýshileri men mereke qonaqtary úshin kontserttik baǵdarlama men syılyqtar daıyndalyp, merekelik dastarhan jaıyldy. Sońynan balalar okeanarıýmdy tamashalady.
«Búgin bizdiń kóńil-kúıimiz óte jaqsy. Men barlyq ulandar atynan mektebimiz ben Qorǵanys mınıstrligine osyndaı merekelik sharany uıymdastyrǵany úshin rızashylyǵymdy jetkizgim keledi. Barlyǵyn kele jatqan jańa jylmen quttyqtaımyn», - deıdi Jańa jyldyq shyrshaǵa qatysqan ulan Sháripbek Baqbergen. Aıta ketken jón, 22-23 jeltoqsan kúnderi osyndaı mereke mekteptiń joǵary synyp oqýshylary men «Jas ulan» mektebi áskerı qyzmetshileriniń balalary úshin uıymdastyrylǵan bolatyn.