«Jas ulan» mektebi bolashaq el qorǵandaryn qabyldaýdy bastady
«Áskerı mektepke jalpy bilim berý mektebin bitirgen 9-synyp túlekteri men 15 jasqa tolǵan (bul jastan kem bolmaýy tıis) jasóspirimder iriktelinip alynady. Alaıda bolashaq áskerı qatarǵa qosylýshylar birneshe kezeńnen turatyn konkýrstyq irikteýden ótýi tıis. Іrikteý kezeńniń basty sharty – arnaıy qujattardy tapsyrý, sondaı-aq bozbalalar psıhologııalyq, dene daıarlyǵy jáne medıtsınalyq kýálandyrý boıynsha test tapsyrady», delingen habarlamada.
Barlyq kezeńnen ótken talapker sońǵy sheshýshi kezeńge joldama alady. Qabyldaý komıssııasy atalǵan úsh kezeńniń nátıjesi men orta mektepti bitirýdi rastaýshy qujat boıynsha jalpy upaıdy sanaıdy. Budan jas ulannyń oqýǵa túsýi sheshiledi. Qabyldaý komıssııasy 21 tamyzǵa deıin jumys isteıdi. Kelesi kúni resmı túrde bolashaq bilim oshaǵyna qabyldanýshy úmitkerlerdiń qatary anyqtalatyn bolady.
Nur-sultandaǵy qabyldaý komıssııasynyń málimetinshe, elordalyq áskerı mektepke Qazaqstannyń túkpir-túkpirinen kelgen 420-dan astam jasóspirim qujattaryn tapsyrǵan. Bıylǵy jyly konkýrstyq irikteýde bir orynǵa 3 úmitker talaptanyp otyr.
Qabyldaý komıssııasy jumysy aıaqtalǵan soń, áskerı mektepke qabyldaý 22 tamyz kúni mektep basshysynyń buıryǵymen bekitiledi.
Aıta keterligi, «Jas ulan» respýblıkalyq mektebi – jalpy orta bilim berý baǵdarlamalary boıynsha memlekettik jáne shet tilderin, áskerı pánderdi tereńdetip oqytatyn, sondaı-aq dene shynyqtyrýdy daıarlaýdy júzege asyratyn áskerı oqý orny.
Búgingi tańda «Jas ulan» mektebiniń kóptegen bitirýshileri Qazaqstan, Reseı, Belarýs, Qytaı, Túrkııa jáne Germanııa joǵary áskerı oqý oryndaryna túsip, elimizdiń Qarýly kúshteri nemese ózge elderdiń áleýetti qurylymdarynda qyzmet atqarýda.
