«Jas ulan» mektebi 10 jyldyq mereıtoıyn atap ótýde
ANA. Qarashanyń 4-i. QazAqparat /Jasulan Amanbaıuly/ - Búgin «Jas ulan» respýblıkalyq mektebiniń qurylǵanyna 10 jyl tolýyna oraı merekelik shara ótti,
dep habarlaıdy QazAqparat.
Merekelik shara barysynda «jasulandyqtardyń» sapyna jańadan qosylǵan 89 tárbıelenýshi saltanatty túrde ant qabyldady.
Qorǵanys mınıstriniń orynbasary, general-maıor Nurlan Jolamanov olardyń alǵashqy qanat qaǵystaryna, aldaǵy oqýlaryna sáttilik tiledi.
Arnaıy mektep osydan 10 jyl buryn, qarashanyń 4-de Elbasy - Qarýly Kúshterdiń Joǵarǵy Bas qolbasshysy Nursultan Nazarbaevtyń qatysýymen ashylyp, oǵan Keńes Odaǵynyń Batyry, Halyq Qaharmany, Qazaqstannyń tuńǵysh Qorǵanys mınıstri, armııa generaly Saǵadat Nurmaǵambetovtiń esimi berilgen bolatyn.
«Jas ulan» jalpy orta bilim berip qana qoımaı, aǵylshyn jáne qazaq tilderin tereńdetip oqytady. Munda alǵashqy áskerı daıarlyq pen dene tárbıesine erekshe nazar aýdarylady. Mektep zamanaýı qural-jabdyqtarmen, oqý-ádistemelik bazamen qamtamasyz etilgen. Joǵary synyp oqýshylaryna TL-2000 ushaǵyn basqarý daıyndyǵy ótkiziledi. Mektep bitirisimen olar arnaıy ushqysh kýáligin alyp shyǵady. Túlekter elimizdiń joǵary áskerı oryndarynan bólek, Belarýs, Túrkııa, Germanııa memleketterinde de bilim alyp júr.
