«Jas ulan» áskerı mektepterinde alǵashqy qońyraý soǵyldy

ASTANA. QazAqparat - Astana, Almaty, Qaraǵandy jáne Shymkent qalalaryndaǵy respýblıkalyq «Jas ulan» áskerı mektepterinde jańa oqý jylynyń bastamasy retinde alǵashqy qońyraý soǵyldy, dep habarlaıdy QazAqparat.

QR qorǵanys mınıstrligi baspasóz qyzmetiniń habarlaýynsha, jańa oqý jyly dástúrli túrde «Jas ulan» tárbıelenýshileriniń alańda saltanatty sapqa turyp, oqý ordasynyń týyn shyǵarýdan bastaý aldy.

Búginde tórt áskerı mektepte 1200-den astam jasulandyqtar bilim alyp júr. Bıyl olardyń 600-i mektep tabaldyryǵyn alǵash ret attady. Mektepterde jyl saıyn irikteý, teorııalyq jáne praktıkalyq daıyndyq sapasy kóterilip keledi, sondaı-aq, bilim alýshylardyń ıntellektýaldyq, shyǵarmashylyq jáne sporttyq turǵydan damýyna erekshe kóńil bólinýde.

 

«Jas ulan» tárbıelenýshisi jastaıynan patrıotızm, Otanǵa degen adaldyq jáne mahabbat sezimin boıyna sińirip ósedi. Mektep tárbıelenýshileri memlekettik jáne shetel tilderin tereńdetip oqıdy. Sondaı-aq, dene tárbıesimen aınalysady, áskerı tártipti úırenedi.

Aıta ketý kerek, respýblıkalyq «Jas ulan» áskerı mektepteriniń túlekteri bilim ordasyn támamdaǵannan keıin áskerı ispen aınalysýdy jalǵastyra beredi. Olar áskerı joǵary oqý oryndaryna túsip, QR Qarýly kúshteriniń jáne taǵy da basqa  áleýetti qurylymdardyń qyzmetkeri atanady.