Jas tennısshiler Aqtóbedegi halyqaralyq týrnırde úsh chempıondyq ataqty jeńip aldy
ASTANA. KAZINFORM — Aqtóbe qalasyndaǵy ACE tennıs ortalyǵynda J60 Aktobe Open-1 halyqaralyq jasóspirimder týrnıriniń jeńimpazdary anyqtaldy.
Qazaqstandyq sportshylar óz alańyndaǵy jarysta sátti óner kórsetip, jekeleı jáne juptyq synda úsh chempıondyq ataqqa qol jetkizdi.
Halyqaralyq tennıs federatsııasynyń (World Tennis) qoldaýymen ótkizilgen týrnırge segiz eldiń — Qazaqstan, Reseı, Belarýs, Qytaı, Tájikstan, Ázerbaıjan, Ózbekstan jáne Armenııanyń jas tennısshileri qatysty.
Uldar arasyndaǵy jekeleı synda fınalǵa eki qazaqstandyq sportshy shyqty. Sheshýshi kezdesýde aqtóbelik Mansur Saıynov pen Haqnazar Jetkerbaı ózara myqtyny anyqtady. Nátıjesinde M.Saıynov chempıon atansa, H.Jetkerbaı kúmis júldeni qanaǵat tutty.
Qyzdar arasyndaǵy jekeleı synda Ekibastuz qalasynyń ókili ıAsmın Dúısembaeva jeńiske jetti. Ol fınalda reseılik Krıstına Kamolovadan basym túsip, týrnırdiń altyn júldesin jeńip aldy.
Uldar arasyndaǵy juptyq synda da qazaqstandyq tennısshiler úzdik nátıje kórsetti. Aqtóbelik Mansur Qaqambetov pen Mansur Saıynov chempıondyq ataqqa qol jetkizdi. Al Ázerbaıjan ókili Rafael Gýseınov pen astanalyq Mustafa Arafat kúmis júldeger atandy.
Osylaısha Mansur Saıynov atalmysh jarysta jekeleı jáne juptyq synda top jardy.
Qyzdar arasyndaǵy juptyq synda reseılik Valerııa Galıaeva men Krıstına Kamolova jeńimpaz atandy. Qazaqstandyq Gaýhar Aqtan (Astana) men Evelına Balaganskaıa (Almaty) fınalǵa deıin jetip, kúmis júldege ıe boldy.
Qazaqstan tennıs federatsııasynan málim etkenindeı, World Tennis Juniors serııasyndaǵy halyqaralyq týrnırler jas tennısshilerdiń kásibı sportqa qadam basýynda mańyzdy ról atqarady. Mundaı jarystar sportshylarǵa halyqaralyq tájirıbe jınaqtaýǵa, reıtıngtik upaılar ıelenýge jáne sheberlikterin shyńdaýǵa múmkindik beredi.
Eske sala keteıik, budan buryn Jibek Qulambaevanyń Úndistandaǵy týrnırde qarsylasyn kambekpen jeńgenin jazǵan edik.
