Jas tennısshi Ahmadı Maqanov týraly ne bilemiz
ASTANA. KAZINFORM – Aqtóbe tennıs mektebiniń túlegi Ahmadı Maqanov 14 jasqa deıingiler arasynda Tennis Europe jańartylǵan reıtıngisinde 13-orynǵa kóterildi.
Pavel Tsoı jattyqtyratyn 13 jastaǵy Ahmadı 2024 jyldy 64-orynmen aıaqtaǵan edi.
Ótken jyly Qazaqstannyń jas juldyzy Tennis Europe aıasynda ótken úsh jarysta (eki ret jekeleı, bir juptyq synda) jeńimpaz atanǵan bolatyn.
Ahmadı 2025 jyldy erekshe tabyspen bastady. Chehııalyq Brjetslav qalasynda ekinshi sanattaǵy týrnırde juptyq synda jeńimpaz atandy. Jekeleı synda fınalǵa deıin jetti. Biraq Frantsııadaǵy sýper sanattaǵy Les Petits As jarysyna barý kerek bolǵandyqtan, fınaldyq matchty ótkize almady.
Les Petits As Frantsııanyń Tarb qalasynda 1982 jyldan beri uıymdastyrylyp keledi.
Mamandardyń baǵalaýynsha, bul doda AQSh-ta 14 jasqa deıingiler arasynda jekeleı synda resmı emes álem chempıonaty bolyp sanalatyn Orange Bowl týrnırimen barabar deýge bolady. Munda ár jyldary Maıkl Chang, Rafael Nadal, Endı Marreı, Kım Klısters, Lındseı Devenport, Martına Hıngıs jáne basqa ataqty tennısshiler úzdik shyqqan.
Frantsııada Ahmadı Maqanov jekeleı synda ekinshi aınalymǵa deıin jetti. Al juptyq synda majarstandyq Vensel Fıjesespen birge sensatsııa jasap, shırek fınalda álemniń 3-raketkasy, ıspanııalyq Karlos Alkarastyń inisi Haıme Alkaras – Kaılı Vandy 6:4, 6:4 esebimen tize búktirdi. Buǵan deıin osy týrnırde qazaqstandyqtardan eshkim jartylaı fınalǵa deıin jetken emes.
A.Maqanov qazirgi kezde 14 jasqa deıingiler arasynda Qazaqstanda kósh bastap tur. Al 18 jasqa deıingiler arasynda ITF Juniors reıtıngisinde 1039-satyda keledi. Aldaǵy ýaqytta tabysty óner kórsetse, budan da joǵarylaıtyny anyq.
Ahmadıdiń bapkeri Pavel Tsoıdyń aıtýynsha, shákirti qazirgi kezde Astanada Team Kazahstan akademııasynda jattyǵýda.
- Bıylǵy maýsymdaǵy maqsatymyz – Tennis Europe reıtıngisinde TOP-5-ke kirý. Sondaı-aq 14 jasqa deıingiler arasynda komandalyq álem chempıonatyna qatysý úshin Qazaqstan quramasyna engimiz keledi. Eki aptadan keıin sýper sanattaǵy Tennis Europe jarystaryna qatysý úshin Frantsııaǵa, sosyn Shvetsııaǵa attanamyz, -dedi Kazinform tilshisine P.Tsoı.
Eske sala keteıik, budan buryn Sandýǵash Kenjebaevanyń úsh ret qatarynan Túrkııadaǵy týrnırde úzdik atanǵanyn jazǵan bolatynbyz.