Jas talant Móldir Baıbýrınova: Án – men úshin jan tynyshtyǵy
ASTANA.KAZINFORM – Álemdik hıt ánderdi qazaq tilinde sheber oryndap, áleýmettik jeli qoldanýshylarynyń yqylasyna bólengen jas talant Móldir Baıbýrınova «Jibek Joly» telearnasynyń efırine qonaq bolyp keldi.
Suhbat barysynda jas talant ne sebepti Djennıfer Lopestiń Ain’t Your Mama ánin tańdaǵanyn túsindirdi.
– Djeı Lonyń alǵashqy ánderiniń kóbinde tsenzýraǵa ilinetin sózder kezdesedi, dóreki tirkester de bar. Sol sebepti «Ain’t Your Mama» týyndysyn aýdaryp oryndaý tıimdi dep sheshtim. Sondaı-aq «jaýapkershilikti óz moınyńa al, sen bala emessiń, eseıýiń qajet» degen joldary maǵan unady. Bul – kez kelgen adamǵa arnalǵan keńes. Keıde men de ózimdi bala sııaqty ustaımyn.
Sondyqtan bul ánniń maǵynasy kópshilikke ortaq dep esepteımin, – deıdi jas oryndaýshy.
Kaver jasaýdaǵy alǵashqy motıvatsııasy týraly da aıtyp ótti.
– Maǵan ómirimde jańa serpin qajet boldy. Bir kezeńde kúızeliste júrdim. Sol ýaqytta ózimdi án arqyly jubatýǵa tyrystym. Kaver jasaý da sol sáttiń áseri, – deıdi ol.
Sondaı-aq, Móldir Baıbýrınova óziniń kásibı bilimi men qyzmeti týraly da baıandady.
– Negizgi mamandyǵym – jýrnalıstıka. Tórt jyl oqydym. Keıin eki jyl fılologııa salasynda bilim alyp, qazir marketıng salasynda qyzmet etip júrmin. Sonymen qatar mektep kezinde bes jyl vokaldan dáris aldym, – dedi jas talant.
Suhbat barysynda bolashaq josparlaryna qatysty oıyn da jasyrmady.
– Qazir naqty maqsattarymmen bóliskim kelmeıdi. Degenmen, basty armanym qazaq tiliniń sulýlyǵyn kórsetý, ony álemdik deńgeıde tanytý. Bul men úshin jaı hobbı emes, qoǵamǵa paıdaly is dep sanaımyn. Jalpy nostalgııalyq ánderdi unatamyn. Mysaly, Backstreet Boys toby Qazaqstanǵa keledi múmkin sol toptyń ánderin aýdarym múmkin , – dep sózin túıindedi.
Eske salaıyq, Djennıfer Lopes qazaq ánshisiniń kaverin Stories-inde bóliskenin jazǵanbyz.