Jas tərtip saqshylary kóshe tərtibin velosıpedpen baqylaýda - Almaty ІІD (FOTO)
ALMATY. QazAqparat - Almatyda jas tərtip saqshylary saıabaqtarda qoǵamdyq tərtiptiń saqtalýyn velosıpedpen baqylaýda. Bul týraly qalalyq ІІD baspasóz qyzmeti habarlady.
Bul jańa bastamany qala kolledjderiniń stýdentteri kóterdi. Jas kómekshiler ótken senbide respýblıka saıabaǵyn velosıpedpen sholyp shyqty.
"Mundaı bastama jastardyń qoǵamdyq tərtipti saqtaýǵa degen yntasyn, qylmysqa tózbeýshilik prıntsıpin kórsetedi. Jasaq músheleri arnaıy formamen qamtylǵan. Olardyń basty mindeti - qylmystyń aldyn alý, túsindirý jumystaryn júrgizý. Endi jastar jasaǵy adam kóp shoǵyrlanǵan jerlerde qoǵamdyq tynyshtyqty kúzetetin bolady",- dedi qalalyq ІІD jasóspirimder polıtsııasy basqarmasynyń basshysy Leıla Əlipbaeva.
Aıta ketý kerek, Almatyda eń alǵash polıtsııa kómekshileriniń jasaǵy jalpy bilim beretin mektepterdiń bazasynda qalyptasqan edi. Bıyl naýryzda mundaı ınstıtýt kolledjderde de engizildi.
