«Jas Suńqar» áskerı-patrıottyq klýbynyń úshkúndik respýblıkalyq jıyny aıaqtaldy

Jeńimpazdardy ótpeli  kýbok pen «Nur Otan» partııasynan dıplomdar kútip tur. Bul týraly Qorǵanys mınıstrliginiń baspasóz qyzmetinen habarlandy.

Jıynǵa 13 pen 16 jas aralyǵyndaǵy bozbalalar men boıjetkender qatysty. Olardyń barlyǵy áskerı-sporttyq klýbtardyń, kadet synyptarynyń, áskerı-sporttyq baǵyttaǵy mektep-ınternattardyń túlekteri. «Eń úzdik» ataǵyna Qazaqstannyń túkpir-túkpirinen jınalǵan 12 klýbtyń ókilderi talasqa tústi. Osy jıyn barysynda jasóspirimder qarý-jaraqty bólshekteý men jınaýda óte jaqsy nátıjeler kórsetip, eki myń metr qashyqtyqqa júgirip, tipti qoıan qoltyq kúreste de bás bermedi.

Sondaı-aq, atalǵan shara sheńberinde keshe QR QK QÁ Aeroutqyr áskerleriniń áskerı qyzmetshileri, ózderiniń kásibı merekelerinde, Otanymyzdyń keleshek qorǵaýshylary aldynda jaýyngerlik sheberlikterin pash etken bolatyn.

Bul kúni qadirmendi qonaqtar men qaorǵanys basshylyǵy jeke quramdy kásibı merekelerimen quttyqtap, al jaýynger-desantshylar óz kezeginde kedergiler alabynan ótip, «qala jaǵdaıynda jaýyngerlik qımyldar jasaý» barysynan epızod qoıyp, qoıan-qoltyq urys tásilderin qoıylym túrinde kórsetti.

Áýe-desant áskerleri Qarýly kúshteriniń tarıhyna engizgen jarqyn sátteri az emes. Olardyń erlikteri men erjúrektiligi, Otanǵa degen sheksiz mahabbattary óshpes dańqqa aınaldy. Búginde jaýynger-desantshylar áskerge daıyndalyp júrgen jas urpaqtyń júreginde qurmet pen maqtanysh týdyrady.