Jas sarbazdardyń psıhologııalyq kóńil-kúıi nashar — Natalıa Dementeva

ASTANA. KAZINFORM — Qorǵanys mınıstrligi áskerde bolyp jatqan jaıttardy muqııat qarap, qorytyndy shyǵarýy tıis. Mundaı pikirdi Májilis depýtaty Natalıa Dementeva bildirdi.

— Balam áskerde, Allaǵa shúkir, bir aıdan keıin keledi. Kútip otyrmyz. Árıne, áskerde bolyp jatqan jaǵdaı bárimizdi alańdatady. Balasyn áskerge jiberý kez kelgen ata-ananyń mindeti dep oılaımyn. Bir jyl buryn osy maqsatpen balamyzdy áskerge jiberdik. Menińshe, Qorǵanys mınıstrligi mindetti túrde áskerde bolyp jatqan jaıttarǵa muqııat qarap, qorytyndy shyǵarý tıis. ıAǵnı, áskerge reforma qajet bolyp otyr, — dedi depýtat Májilistiń jalpy otyrysy aldynda BAQ ókilderiniń saýalyna oraı.

Onyń atap ótýinshe, sońǵy birneshe jyldyń ishinde áskerı bólimderde reforma jasalyp, júzdegen kameralarmen, basqa da qurylǵylarmen jabdyqtaldy.

— Biraq, bul áli de jetkiliksiz. Eń aldymen ásker ákimshiligi mindetin adal ári durys atqarýy tıis. Munan bólek, jańadan kelgen jas sarbazdarǵa muqııat qaraý kerek. Óıtkeni, olardyń psıhologııalyq jaǵdaıy keıde nashar bolyp keledi. Jyldan jylǵa jas sarbazdardymyzdyń psıhologııalyq jaǵdaıy, psıhologııalyq kóńil-kúıi óte nashar, — dedi Natalıa Dementeva.

Esterińizge sala ketsek, osy jyldyń ózinde birneshe sarbaz qaza tapty. Máselen, 17 qyrkúıekte Gvardeısk garnızonyndaǵy áskerı bólimderdiń birinde merzimdi áskerı qyzmet atqaryp júrgen sarbaz ózine qol jumsady. 19 mamyrda Aıagóz qalasynyń ortalyq aýdandyq aýrýhanasynda merzimdi áskerı qyzmetshi bakterıaldy menıngıttiń gıpertoksıkalyq túrinen qaıtys boldy.