Jas sarbazdar Otan ananyń aldynda ant berdi
ASTANA. 27 shilde. QazAqparat - Búgin QR ІІM Іshki áskerler Astana garnızony №5570 áskerı bóliminiń jas sarbazdary Otan qorǵaýshylar (Otan ana) monýmenti aldynda saltanatty túrde ant qabyldady.
Shara 1995 jyly tájik-aýǵan shekarasynda erlikpen qaza bolǵan Іshki ásker jaýyngerleriniń eskertkish taqtasyna gúl shoqtaryn qoıý rásiminen bastaldy. Bul jerde qurmetti qaraýyl úsh dúrkin salıýt berdi. Al jınalǵan qaýym erlikpen qaza bolǵan jaýyngerlerdi bir mınýttik únsizdikpen eske aldy. Osydan keıin Otan qorǵaýshylar monýmenti aldynda bıyl ishki áskerge shaqyrylǵan jáne jas sarbaz kýrsyn ótken jaýyngerler áskerı ant qabyldady. Sońynda jas sarbazdar saltanatty sherýmen júrip ótti.
Sharaǵa Іshki áskerler Bas qolbasshylyǵynyń, memlekettik organdar men qoǵamdyq uıymdardyń ókilderi men Іshki áskerler ardagerleri, sondaı-aq sarbazdardyń týǵan-týystary qatysty.
