Jas sarbazdar áskerı qaıratkerlermen júzdesti
ASTANA. KAZINFORM — Elordada memleket jáne áskerı qaıratkerler men «Jas sarbaz» tárbıelenýshileri arasynda taǵylymdy kezdesý ótti. Óner mýzeıinde uıymdastyrylǵan basqosýda qatysýshylar aldymen ulttyq aspaptardyń tarıhymen tanysty.
Óner mýzeıi 2025 jyldyń 9 qazanynda ashyldy. Munda qazaq halqynyń baı mýzykalyq murasy keńinen usynylǵan. Ekspozıtsııaǵa sazsyrnaıdyń álemde kezdesetin 400-den astam túri qoıylǵan. Sondaı-aq, erteden jetken urmaly-soqpaly jáne silkimeli aspaptardyń 20-dan astam úlgisi bar.
Kezdesýde eki býyndy da qyzyqtyrǵan kóne úrmeli aspaptyń biri — kerneı. Bul aspap erte zamanda áskerı maqsatta paıdalanǵan. Kerneı arqyly jaýgershilik zamanda atoı shaqyryp, dabyl qaǵyp, habar taratqan.
Іs-shara aıasynda «Joshy Qazaq National Group» ansambli óner kórsetti. Ujym mýzeı tórinde turǵan ár aspaptyń tarıhyn tanystyryp, jandy daýysta birneshe mýzykalyq shyǵarma oryndady.
— Jetinshi mamyr — Otan qorǵaýshylar kúnine oraı Óner mýzeıine keldik. Іs-shara barysynda áskerı qaıratkerlermen kezdestim. Túrli tarıhı shaıqastarda qoldanylǵan ulttyq aspaptarmen tanystym. Sol kezeńderde oryndalǵan kúılerdi tyńdadym. Jandy daýysta oryndalǵan shyǵarmalar erekshe áser qaldyrdy. Áýender boıyma rýh berdi. Kóne zamannyń tynysyn sezingendeı kúı keshtim. Kórgenim men estigenimniń bári kóńilimnen shyqty, — deıdi «Jas sarbaz» tárbıelenýshisi Ámına Turǵyn.
Kezdesý sońynda memleket jáne áskerı qaıratkerler jas býynǵa izgi tilekterin jetkizdi. Olar Otanǵa adal qyzmet etýdiń mańyzyn atap ótti.
— Bizdiń kezdesýimiz Qarýly kúshter kúnine oraı ótti. Ókinishke qaraı, mundaı ortalyqtyń bar ekenin buryn bilmeppiz. Іs-shara bizge úlken áser qaldyrdy. Bir sátke babalar dáýirine engendeı kúı keshtik. Sondyqtan mundaı tanymdyq kezdesýler jastar úshin asa mańyzdy dep sanaımyn, — deıdi Halyq qaharmany, armııa generaly Muhtar Altynbaev.
Aıta keteıik, Astanada myńǵa jýyq ulan alaıaqtyqtan qorǵaný tásilderin meńgerdi.