«Jas sarbaz» áskerı-patrıottyq balalar lagerleri jumysyn bastady
Búgin Şýchınsk-Býrabaı kýrorttyq aımaǵyna bir aptalyq jazǵy demalysqa shalǵaı garnızondardan 12-14 jas aralyǵyndaǵy balalardyń alǵashqy toby kelip jetti. Olardyń arasynda sporttyń ár túri boıynsha respýblıkalyq jarystarǵa qatysqan oqýshylar bar.
«Jas sarbaz» áskerı-patrıottyq balalar lageriniń birinshi aýysymynyń ashylý saltanatyna Bas shtab bastyǵynyń orynbasary – Tárbıe jáne ıdeologııalyq jumystar departamentiniń bastyǵy Serik Borambaev qatysty.
««Jas sarbaz» áskerı-patrıottyq lagerinde sender demalyp qana qoımaı, jańa dostar taýyp, bolashaq Otan qorǵaýshyǵa qajetti bilim men bilikterińdi de shyńdaı túsesińder. Sender shymyr da myqty jáne týǵan jerin súıetin azamat bolyp ósýleriń kerek», – dedi general-maıor Serik Borambaev.
Balalar jylynda Tárbıe jáne ıdeologııalyq jumystar departamenti mamandary Ulttyq áskerı-patrıottyq ortalyǵy men Ortalyq sport klýbymen birlesip mádenı-demalys jáne sporttyq is-sharalardy, joryqtar men ekskýrsııalardy qamtıtyn baǵdarlamalar daıyndady.
Jasóspirimder jerge baǵdarlaý júrgizý men ormanda ómir súrý sabaqtaryn alady, ımprovızatsııalanǵan materıaldardan shatyr ornatýdy, lager jaǵdaıynda tamaq daıyndaýdy úırenedi.
Almaty oblysyndaǵy áskerı-patrıottyq balalar lagerinde de oqýshylarǵa eki aptalyq aýysymǵa arnalǵan mazmundy baǵdarlama daıyndalǵan. Onda Almaty qalasyna ekskýrsııalar, haıýanattar baǵy men delfınarııge barý, kontsertter, konkýrstar qarastyrylǵan. Budan bólek, Ortalyq sport klýbynyń ataqty olımpıadalyq sportshylarymen kezdesýler uıymdastyrylady.
Sondaı-aq Ortalyq sport klýbynyń Panfılov kentindegi oqý-jattyǵý ortalyǵyna barý josparlanǵan. Onda bilikti nusqaýshylar arqan parkinde sheberlik sabaqtaryn ótkizip, sporttyq snarıadtarda jattyǵýlar kórsetedi.
