«Jas sarapshy - 2014» respýblıkalyq baıqaýy bastaldy

ASTANA. QazAqparat - Aǵymdaǵy jyldyń 11 qyrkúıeginde Astana qalasynda QR Mádenıet jáne sport mınıstrliginiń qoldaýymen «Bolashaq» qaýymdastyǵy, «Ekonomıkalyq zertteýler ınstıtýty» AQ qazaqstandyq joǵarǵy oqý oryndaryndaǵy ekonomıkalyq mamandyqtardyń sońǵy kýrs stýdentteri jáne magıstranttary arasynda ǵylymı-zertteý jumystaryna yntalandyrý boıynsha «Jas sarapshy» respýblıkalyq baıqaýynyń tusaý keserine arnalǵan baspasóz konferentsııasyn ótkizdi, dep habarlaıdy «Bolashaq» qaýymdastyǵynyń baspasóz qyzmeti.

Baspasóz konferentsııasyna «Bolashaq» Qaýymdastyǵy Keńesiniń múshesi, QR ulttyq ekonomıka vıtse-mınıstri Mádına Ábilqasymova, «Ekonomıkalyq zertteýler ınstıtýty» AQ Prezıdenti Maqsat Muqanov, «Bolashaq» qaýymdastyǵynyń atqarýshy dırektory Ermek Maqashev, «jas sarapshy - 2013» baıqaýynyń jeńimpazy Aıjan Arynova qatysty.

«Bolashaq» qaýymdastyǵynyń atqarýshy dırektory Ermek Maqashev: «Qaýymdastyqtyń óz qyzmeti barysynda jas ǵalymdar, sarapshylar, stıpendıattar men «Bolashaq» baǵdarlamasynyń túlekteri, sonymen qatar, ekonomıkalyq mamandyqtardyń stýdentteri men magıstranttarynyń ǵylymı-zertteý bastamalaryna belsendi túrde qoldaý kórsetedi», - dep erekshe atap ótti.

Baıqaýdyń maqsaty - stýdentterdi ǵylymı-zertteý jumystaryn yntalandyrý, daryndy jastardy anyqtaý jáne olarǵa qoldaý kórsetý, QR joǵarǵy oqý oryndary túlekteriniń daıyndyq deńgeıin arttyrý.

Baıqaý eki tilde - qazaq jáne orys tilderinde ótedi. Jeńimpazdar QR Ulttyq ekonomıka mınıstrliginde jáne «Ekonomıkalyq zertteýler ınstıtýty» AQ tájirıbeden ótý múmkindigin ıelenedi.

Baıqaýǵa qatysý úshin baıqaýdyń erejesimen, esse taqyrybymen, qatysý protsedýrasymen tanysýy qajet jáne sáıkes aqparatty uıymdastyrýshylardyń saıtynda kórsetilgen elektrondy meken-jaıǵa jiberýleri tıis. Baıqaý komıssııanyń quramynda - ozyq mamandar, ekonomıkalyq mamandyqtar boıynsha bilim alǵan, aıtarlyqtaı tájirıbege ıe «Bolashaq» baǵdarlamasynyń túlekteri bar.

Baıqaý úshinshi jyl qatarynan ótkizilip keledi. 2012 jáne 2013 jyldary baıqaýǵa elimizdiń 40 joǵarǵy oqý ornynyń 400-den astam stýdenti qatysty. 2012-2013 jyldardaǵy «Jas sarapshy» baıqaýynyń jeńimpazdary «Ekonomıkalyq zertteýler ınstıtýty» AQ jumysqa ornalastyryldy. Atap aıtqanda, 2012 jyldyń jeńimpazdary Uljan Maratqyzy jáne Aıjan Muqyshbaeva Aımaqtyq jáne áleýmettik zertteýler ortalyǵyna, al 2013 jyldyń jeńimpazy Aıjan Arynova Ǵylymı ekonomıkalyq saraptama ortalyǵyna ornalasty.