«Jas sarapshy - 2012» respýblıkalyq baıqaýy jalǵasýda
ASTANA. 17 qazan. QazAqparat - Stýdentter arasyndaǵy «Jas sarapshy - 2012» respýblıkalyq baıqaýy jalǵasýda. Osyǵan oraı búgin Astanada konkýrs uıymdastyrýshylarynyń arnaıy baspasóz máslıhaty ótti.
Konkýrs úılestirýshisi Aıan Áljanovtyń aıtýynsha, «Jas sarapshy - 2012» baıqaýynyń basty maqsaty - stýdentterdiń ǵylymı áleýetin kóterip, otandyq ekonomıkanyń ózekti máselelerin sheshý. «Bıylǵy baıqaýdy biz ekonomıka mamandyǵy boıynsha oqyp jatqan stýdentter arasynda uıymdastyryp otyrmyz. Konkýrs jumystarynyń 25 qazanǵa deıin qabyldanatynyn taǵy bir márte eske salamyz. Jeńimpazdarǵa «Úzdik jas ekonomıst» ataǵy, sondaı-aq baǵaly syılyqtar men kýálikter tabystalady», - deıdi A.Áljanov.
Aıta keteıik, konkýrsqa jiberiletin jumystar QR Ekonomıkalyq damý jáne saýda mınıstrliginiń Ekonomıkalyq zertteýler ınstıtýty usynǵan taqyryptar boıynsha esse úlgisinde jazylýy shart. Olar - «QR Ulttyq qory: qarajatty tıimdi qoldaný saıasaty», «QR zeınetaqy júıesi: máseleler men olardy sheshý joldary», «Qazaqstandaǵy halyqtyq IPO-nyń bolashaǵy: artyqshylyqtary men kemshilikteri», «Qazaqstannyń Dúnıejúzilik saýda uıymyna qosylýynyń saldary» jáne «Qazaqstannyń shaǵyn jáne orta bıznesiniń biryńǵaı ekonomıkalyq keńistiktegi básekege qabilettiligi: sharýashylyqty júrgizý jaǵdaıyn salystyrý». Úsh kezeń boıynsha ótetin konkýrstyń barlyq jumystaryn kásibı mamandar tekseredi. Qatysýshylar bolsa, óz jobalaryn info@bolashak.kz poshtasyna jibere alady.
