Jas rejısser Sáken Joldas «Qazposhtanyń» kómegimen áke men bala týraly áserli rolık túsirdi - VIDEO
ASTANA. QazAqparat - Qazaqtyń jas rejısseri, «On ı Ona» atty fılm arqyly Qazaqstanǵa keń tanylǵan Sáken Joldas «Qazposhtanyń» kómegimen otbasy qundylyqtary týraly áserlı rolık túsirgen. Rolık endi «Qazposhta» kompanııasynyń jarnamalyq ónimi bolady.
Nebary 2 mınýt ishinde rejısser shalǵaıdaǵy Shyǵys Qazaqstan oblysy Aıagóz aýdanynda qalǵan áke men Almaty qalasynda turatyn balanyń ómirin baıandaıdy. Kezinde, ákesi aşy sýdyń býymen balasyn úıden qýyp shyqqan eken. Osylaısha, ákesi men ulynyń arasynda jyldarǵa sozylǵan arazdyq ornaıdy. Biraq, otbasyn qurǵannan soń, áıeli sábı syılaǵan soń bala ákeniń qadirin túsinedi. Al, aýylda qalǵan áke kúnde poshtashy qyzdyń jolyn kútip, balasynan bir habar kútip júredi. Balasy nemeresiniń sýretin, oǵan qosa, Almatyǵa poıyz bıletin salyp, ákesinen keshirim surap hat jazady. Osylaısha, «Qazposhta» áke men bala arasyn qaıta jalǵaǵan poshtanyń paıdasyn kórsete otyryp, rolıkti «Qazposhta jaqyndatady» dep ataǵan.
Al, rejısser Sáken Joldas Feısbýktegi jeke paraqshasynda bul oqıǵa ishinara shyn ómirden alynǵanyn jazǵan.
«Qurmetti dostar! Jýyrda Qanat Beısekeevpen birge «Qazposhtanyń» kómegimen ishinara shyn ómirden alynǵan ákesi men uly arasyndaǵy áleýmettik oqıǵany túsirdik. Óz atymnan aıtarym, jaqyndaryńyzǵa jıi hat jazyńyzdar. Jalpy, hat jazý týraly ıdeıa maǵan qatty unaǵan. Qaǵaz ben qalam alyp, hat jazyp, markany tańdap, bir habar jiberý erekshe qubylys emes pe!? Ýaqyttaryńyz shyqsa, erinbeı hat jazyńyzdar! Jaqyndaryńyz bir qýanyp qalady», - degen rejısser Qazposhta Qazaqstannyń barlyq eldi mekeninde jumys isteıtinin eske salǵan.
Jalpy, Youtube-taǵy «Qazposhta jaqyndatady» degen rolıkti eki kúnde bes myńǵa jýyq adam kórip, óz baǵasyn bergen.
