Jas pıanısterdiń І Halyqaralyq festıval-baıqaýynyń qazylar alqasynyń quramy anyqtaldy
ASTANA. 15 qańtar. QazAqparat - Jas pıanısterdiń І Halyqaralyq «Astana Piano Passion» festıval-baıqaýyndaǵy qazylar alqasynyń quramyna tanymal pıanıst, Reseıdiń eńbek sińirgen ártisi, P.I. Chaıkovskıı atyndaǵy Máskeý memlekettik konservatorııasynyń fortepıano fakýlteti arnaıy fortepıano kafedrasynyń professory Pavel Nersesıan enedi.
Elordanyń resmı saıtynyń jazýynsha, Nersesıan Pavel Tıgranovıch L. Vann Bethoven atyndaǵy (Vena, 1985, II syılyq), Palomy O'Shı (Santander, 1987, IV syılyq), Tokıoda (1989, V syılyq), Dýblın atyndaǵy (GPA; 1991, I syılyq) halyqaralyq syılyqtardyń laýreaty bolyp tabylady.
Buǵan deıin habarlaǵanyndaı, Pavel Nersesıannan basqa jas pıanısterdiń І Halyqaralyq «Astana Piano Passion» festıval-baıqaýy qazylar alqasynyń quramynda P.I. Chaıkovskıı atyndaǵy Máskeý memlekettik konservatorııasynyń professory - Valerıı Pıasetskıı; Qurmanǵazy atyndaǵy Qazaq Ulttyq konservatorııasynyń rektory, QR halyq artısi, QR Memlekettik syılyǵynyń laýreaty, professor - Janııa Áýbákirova; «Astana-Opera» opera jáne balet teatrynyń bas dırektory, QR Memlekettik syılyǵynyń laýreaty - Tólegen Muhamedjanov, sondaı-aq QHR, Ońtústik Koreıa jáne AQSh ókilderi bar. Qazylar alqasynyń qurmetti múshesi jáne baıqaýdyń ıdeıalyq jetekshisi - Reseıdiń halyq artısi Denıs Matsýev.
Eske salaıyq, jas pıanısterdiń festıval-baıqaýy Astana qalasynda 2013 jyldyń 10-y men 16 mamyry aralyǵynda ótedi. Baıqaýǵa qatysý úshin ótinimder qabyldaý bastaldy. Ol 2013 jyldyń 10 naýryzyna deıin jalǵasady. Baıqaýdyń júlde qory - 50 000 AQSh dollary.
