Jas pıanısterdiń baıqaýyna qatysýǵa ótinim qabyldaý 20 naýryzǵa deıin uzartylady

Bul týraly elordanyń resmı saıtynan habarlady.

Baıqaýǵa túrli elderdiń jáne Qazaqstannyń eń shalǵaı aýdandarynyń balalary qatysady dep kútilýde. Baıqaýdyń talaptary jarııalanǵannan keıin áleýetti qatysýshylar uıymdastyrý komıtetine baǵdarlamaǵa naqty daıyndalyp, beınematerıaldardy ýaqytynda jiberý úshin ótinim qabyldaý merzimin uzartý týraly ótinish jasady.

Uıymdastyrý komıteti ótinim qabyldaý merzimin 20 naýryzǵa deıin uzartýǵa sheshim qabyldady. Bul is-shara baıqaýdyń kórkemdik jetekshisi Denıs Matsýevtiń pikirinshe, jas pıanısterdiń baıqaýǵa kóptep qatysýyna jáne óz eli men aımaǵynyń namysyn abyroımen qorǵaýyna daıyndalýǵa mol múmkindik beredi. "Astana Piano Passion" halyqaralyq jas pıanıster baıqaýy álemdik mýzyka baıqaýlarynyń barlyq sharttaryna tolyq sáıkes keledi. Baǵdarlamanyń kúrdeliligi osyǵan baılanysty bolýda. Degenmen, talantty balalar daıyndyqty qazirdiń ózinde bastap ketti.

Eske salaıyq, Astanada 2013 jyldyń 10-16 mamyry aralyǵynda ótetin "Astana Piano Passion" birinshi halyqaralyq jas pıanıster baıqaýyna qatysý úshin ótinimder qabyldaý 10 qańtarda bastaldy. Baıqaýdyń uıymdastyrýshylary - Astana qalasy ákimdigi men "Accordi di Astana" qoǵamdyq qory.

Baıqaýdy ótkizý fortepıano óneri salasynda jańa talanttardy taýyp, qoldaýǵa, Qazaqstannyń ulttyq fortepıano mektebi dástúrin nyǵaıtýǵa, sondaı-aq, túrli memleketterdiń ulttyq mektepteri arasynda shyǵarmashylyq baılanys ornatýǵa múmkindik beredi. Sonymen qatar, uıymdastyrýshylardyń pikirinshe, klassıkalyq fortepıano mýzykasyn nasıhattaý tek Qazaqstanda ǵana emes, búkil dúnıejúzinde óskeleń jetkinshek urpaqty tárbıeleýdiń rýhanı mańyzdy quramdas bóligi bolýy qajet.