Jas pedagog Ulttyq biliktilik testin tapsyrǵannan keıin ǵana jumysqa qabyldanady – QR BǴM
Bul týraly QR Bilim jáne ǵylym mınıstrliginen málim etti, dep habarlaıdy QazAqparat tilshisi.
Vedomstvo málimetinshe, bul jańashyldyq kadr sapasyn arttyrýǵa baǵyttalǵan. Biliktilik testi túlekterdiń pán boıynsha bilimi men oqytý ádistemesiniń deńgeıin anyqtaýǵa múmkindik beredi.
«Mundaı jańashyldyq bilikti pedagogter balalarymyzǵa sapaly bilim berýleri úshin engizilip otyr. Bıyl oqýyn támamdaǵan joǵary oqý oryndarynyń túlekteri men osy ýaqytqa deıin mektepte jumys istemegen pedagogter Ulttyq biliktilik testin tapsyrýy tıis. Test tapsyryp, qajetti ball jınaǵan túlekterdi ǵana jumysqa qabyldaý josparlanyp otyr. Ulttyq biliktilik testi biliktiligin dáleldegennen keıin túlekter óz kásibı daǵdylaryn mektep qabyrǵasynda kórsete alady. Bul jańashyldyq oqýyn aıaqtap, pedagog bolyp jumys isteýge nıet bildirgen tulǵalarǵa ǵana qatysty. ıAǵnı, jumys istep júrgen muǵalimderge bul talaptar qoıylmaıdy», – dedi QR BǴM Mektepke deıingi jáne orta bilim komıtetiniń tóraıymy Maıra Meldebekova.
Qazaqstandyq joǵary oqý oryndaryna jańashyldyqtyń oryndylyǵy men qajettiligi týraly túlekter arasynda aqparattyq-túsindirý jumystaryn júrgizý tapsyryldy. Ulttyq biliktilik testi bastaldy. Testti tapsyrý úshin Ulttyq testileý ortalyǵynyń saıtynda aldyn ala tirkelý qajet.
Esterińizge sala keteıik, 2020 jyldan bastap joǵary oqý oryndaryna pedagogıkalyq mamandyqtar boıynsha túsýge nıet bildirgen túlekterge qoıylatyn talaptar kúsheıtildi. Eger buryn UBT-da bolashaq pedagogter úshin shekti ball 50 bolsa, endi shekti ball 75-ke deıin kóterildi. Shákirtaqy kólemi de 26 myńnan 42 myń teńgege deıin ulǵaıtyldy. Osy jyldyń qyrkúıek aıynan bastap elimizdegi barlyq stýdenttiń shákirtaqysy 20%-ǵa ósetinin aıta ketken jón.
