Jas otbasylarǵa baspana satyp alý úshin alǵashqy salym kólemin azaıtý kózdelýde
ASTANA. QazAqparat - Qazaqstannyń «Turǵyn úı qurylys jınaq banki» «Nurly jer» baǵdarlamasy arqyly baspana alýǵa kelgen jas otbasylarǵa alǵashqy salym kólemin azaıtýdy kózdeýde. Bul týraly búgin Parlament Májilisinde ótken otyrysta bank basshysy Lázzat Ibragımova málim etti, dep habarlaıdy QazAqparat.
Lázzat Ibragımovanyń aıtýynsha, «Nurly jer» baǵdarlamasy arqyly jergilikti atqarýshy organdarda kezekte turǵan azamattar úshin alǵashqy salym kólemi 50 protsentten 30 protsentke deıin tómendetildi. 20 protsenttik aıyrmashylyq Ulttyq qor esebinen óteletin bolady. Ol úshin 22 mlrd. teńge bólinip otyr. Jeńildikpen beriletin páterlerdiń quny óńirlerde - sharshy metrine 140 myń teńge bolsa, Almaty men Astana qalalarynda - 180 myń teńgeni quraıdy.
«Azamattardyń qalǵan sanattary baspana nesıesin alý úshin onyń 50 protsenttik salymyn engizýi tıis. Biraq qazir biz ákimdiktermen birge onyń kólemin jas otbasylar úshin tómendetý joldaryn izdestirip jatyrmyz. Buǵan qosymsha qarjylyq resýrstar qajet bolady», - dep atap ótti ol.
Investıtsııalar jáne damý vıtse-mınıstri Roman Sklıardyń sózinshe, bıyl «Nurly jer» baǵdarlamasy aıasynda 25 myń páter paıdalanýǵa berý josparlanǵan. Jalpy, 15 jylda baǵdarlama sheńberinde 1,5 mln otbasy baspanamen qamtylady dep mejelengen.
