Jas otbasylardy baspanamen qamtý úshin jeke baǵdarlama ázirlene me – Roman Sklıardyń jaýaby

ASTANA. QazAqparat – Elimizdiń birqatar óńirinde jastardy turǵyn úımen qamtamasyz etý úshin 5 paıyz jeńildikpen kredıt berý baǵdarlamasy ázirlenip jatyr. Bul jaıynda Májilis depýtattarynyń saýalyna Premer-Mınıstrdiń birinshi orynbasary Roman Sklıardyń jaýabynda aıtylǵan, dep habarlaıdy QazAqparat tilshisi.

«Qazirgi ýaqytta elimizdiń birqatar óńirinde jastardy turǵyn úımen qamtamasyz etý úshin jergilikti bıýdjet esebinen 5 paıyz jeńildikpen kredıt berýdiń óńirlik baǵdarlamalary iske asyrylýda. Atap aıtqanda, Almaty jáne Astana qalalarynda, sondaı-aq Qaraǵandy, Jambyl, Qostanaı, Atyraý, Almaty, Aqtóbe, Ulytaý, Jetisý, Abaı oblystarynda jastar baǵdarlamalary iske asyrylyp jatyr. Osy baǵdarlamalarǵa 2017-2022 jyldary aralyǵynda jergilikti bıýdjetterden jáne Otbasy bankiniń qarajaty esebinen 65,2 mlrd teńge (jergilikti bıýdjetten 49,9 mlrd teńge jáne bank qarajatynan 15,3 mlrd teńge) bólindi», - dep atap ótedi Roman Sklıar jaýabynda.

Onyń aıtýynsha, osyndaı baǵdarlamalar basqa óńirlerde, atap aıtqanda, Pavlodar, Túrkistan, Soltústik Qazaqstan, Qyzylorda oblystary men Shymkent qalasynda ázirlenip jatyr.

«Sonymen qatar, respýblıkalyq bıýdjettiń shekteýlerin, sondaı-aq halyqtyń áleýmettik osal toptaryn baspanamen basym qamtamasyz etýdi eskere otyryp, osy kezeńde jas otbasylar úshin jeke baǵdarlamany engizý múmkin emes», - dedi birinshi vıtse-premer.

Aıta keterligi, qazirgi ýaqytta memlekettik turǵyn úı qorynan turǵyn úıge muqtajdardyń esebinde 636,3 myńnan astam adam tur. Onyń ishinde 415,7 myń adam áleýmettik osal toptarǵa kiredi.