Jas otbasylar jaldamaly úıdi jeńildikpen alady
ASTANA. 9 tamyz. QazAqparat - «Qol jetimdi baspana-2020» baǵdarlamasy boıynsha jas otbasylarǵa turǵyn úı jeńildikpen beriledi, dep habarlady "Turǵyn úı qurylysy jınaq bankiniń" baspasóz qyzmeti pm.kz saıtyna.
«Jańa baǵdarlamanyń turǵyn úı qurylysynyń burynǵy baǵdarlamasynan aıyrmashylyǵy, munda azamattardyń barlyq sanattary úshin qurylys salýdyń jáne jalgerlik turǵyn úılerdi satýdyń jańa baǵyttary júzege asyrylady, ári jas otbasylar úshin jeńildikter jasalady», - delingen TQJB habarlamasynda.
Azamattardyń barlyq sanattaryna beriletin jalgerlik turǵyn úı qurylysynyń sharty boıynsha, turǵyn úı qurylys jınaǵy jınaqtalý merzimi ishinde baǵdarlama qatysýshysy jalgerlik úıde turyp, eń tómengi jalgerlik aqy - sharshy metrine 100 teńgeden tólep otyrady.
Jalgerlik turǵyn úı qunynyń 50 paıyzy jınaqtalǵannan keıin, baǵdarlama qatysýshysy páterdi jınaqtalǵan turǵyn úı qurylysy jınaǵy esebinen, 15 jyl merzimge jyldyq stavkasy 4-5 paıyz bolatyn turǵyn úı zaımymen satyp alady. TQJB aqparyna qaraǵanda, azamattardyń barlyq sanattary úshin turǵyn úı qurylysy 2013 jyly bastalady.
Jas otbasylarǵa arnalǵan jalgerlik turǵyn úıge keletin bolsaq, otbasylar páterde jaldaý aqysyn tólemeı turatyn bolady. Jas otbasylardy iriktep, esepke qoıýdy ákimdikter júzege asyrady.
Baǵdarlamaǵa qatysý sharttary boıynsha, jas otbasy dep, 2 jyldan artyq nekede turǵan, ótinish bergen kezde jastary 29-dan aspaǵan erli-zaıyptylar esepteledi ári, jas otbasylardyń baǵdarlamaǵa qatysýǵa ótinish bergen eldi mekende jekemenshik turǵyn úıleri bolmaýy kerek.
«Qoljetimdi baspana-2020» baǵdarlamasynyń qabyldanýy turǵyn úı qurylysy jınaǵyna qyzyǵýshylyqty odan ári arttyryp, banktik klıentteri kóbeıe túsedi dep oılaımyz. Bul memlekettiń halyqtyń turǵyn úı máselesin keshendi sheshý tásilimen baılanysty», - delingen TQJB aqparatynda.
Buryn da habarlanǵandaı, ústimizdegi jyly bank turǵyn úı qurylysy jınaǵyna qatysýshylardyń úlesin 3,4 paıyzǵa deıin arttyryp, uzaq merzimdi teńgelik salymdar naryǵyndaǵy úlesin jáne turǵyn úıdi salý men satyp alýdy nesıelendirýdi 10,4 paıyzǵa ulǵaıtýdy josparlap otyr. Sondaı-aq, turǵyn úı qurylysy jınaǵy júıesine 80 myńnan astam jańa qatysýshylardy tartyp, halyqqa 32 mlrd teńgeden astam turǵyn úı zaımyn berý josparlanýda.
«Qoljetimdi baspana-2020» baǵdarlamasy QR Prezıdentiniń tapsyrmasy boıynsha júzege asyrylýda. Baǵdarlamanyń negizgi maqsaty - paıdalanýǵa beriletin jańa turǵyn úı kólemin 2020 jylǵa qaraı 6 mln-nan 10 mln sharshy metrge deıin ulǵaıtý jáne turǵyn úıdiń qalyń buqara halyq úshin qoljetimdi bolýy.
