Jas otbasylar úshin jalǵa beriletin turǵyn úı salýǵa 10 mlrd. teńge nysanaly transfertter kózdelgen - Óńirlik damý mınıstrligi
ASTANA. 22 qazan. QazAqparat - Jas otbasylar úshin jalǵa beriletin turǵyn úı salýǵa oblystardyń, Astana jáne Almaty qalalarynyń ákimderine aǵymdaǵy jyly 10 mlrd. teńge nysanaly transfertter kózdelgen. Bul týraly búgin Úkimet otyrysynda Óńirlik damý vıtse-mınıstri Qaıyrbek Óskenbaev málimdedi.
Onyń aıtýynsha, 1 qazan jaǵdaıyna 8,2 mlrd. teńge bólinip, 7,2 mlrd. teńge nemese 87 paıyz ıgerilgen.
«Igerýdiń tómen kórsetkishi Mańǵystaý oblysynda - 54 paıyz nemese bólingen 500 mln. teńgeniń 232,2 mln. teńgesi ıgerilmegen», - dep toqtaldy Q. Óskenbaev.
Onyń málimetinshe, buǵan sebep, Aqtaý qalasyndaǵy nysandaǵy jumystar toqtatylyp, qarjy polıtsııasy organdarynyń tekserýinen keıin ǵana qaıta jalǵasqan. Mańǵystaý oblysy ákimdiginiń aqparaty boıynsha, bólingen qarajat jyl sońyna deıin tolyq ıgeriletin bolady.
«2013 jylǵa jas otbasylar úshin jalǵa beriletin turǵyn úıdi paıdalanýǵa berý jospary - 117 myń sharshy metr (1,6 myń páter). 9 aıdyń ishinde kólemi 40,7 myń sharshy metr 680 páter nemese jyldyq jospardyń 35 paıyzy salyndy. Bul rette, 6 oblysta - Aqmola, Shyǵys Qazaqstan, Jambyl, Qaraǵandy, Qostanaı jáne Pavlodarda merziminen buryn 2012 jyly jas otbasylar úshin kólemi 28,2 myń sharshy metr bolatyn 526 páter salynǵanyn atap ótý qajet. Osylardy qosa eseptegende, kólemi 68,9 myń sharshy 1206 páter nemese jospardyń 59 paıyzy salyndy», - dep atap ótti vıtse-mınıstr.
Onyń aıtýynsha, jas otbasylar úshin jalǵa beriletin qalǵan turǵyn úılerdi paıdalanýǵa berý bıylǵy qarasha-jeltoqsan aılaryna josparlanyp otyr.
