Jas otbasylarǵa jeke baspana baǵdarlamasy ázirlene me — Bektenov jaýaby
ASTANA. KAZINFORM — Elimiz boıynsha 960 myń adam turǵyn úıge muqtaj. Bul týraly Májilis depýtattarynyń saýalyna Premer-mınıstr Oljas Bektenovtiń jaýabynda aıtylǵan.
— Búgingi tańda azamattardyń (onyń ishinde jastardyń) turǵyn úı jaǵdaıyn jaqsartýǵa baǵyttalǵan «Dıplommen aýylǵa» (turǵyn úı satyp alýǵa nemese salýǵa bıýdjettik kredıt berý) jáne «Naýryz» ıpotekalyq baǵdarlamasy syndy memlekettik qoldaý tetikteri bar. Osy rette turǵyn úıge muqtaj azamattardyń jalpy sany respýblıka boıynsha shamamen 960 myń adamdy quraıtynyn eskerý qajet. Mundaı jaǵdaıda turǵyn úı saıasatynyń negizgi qaǵıdaty — barlyq azamat úshin teń ári ashyq quqyqtyq rejımdi saqtaý, ıaǵnı turǵyn úıge muqtaj adamdardy esepke qoıý jáne turǵyn úıdi bólý rásimderin biryńǵaı tártippen iske asyrý, — dedi Premer-mınıstr.
Onyń atap ótýinshe, Memleket basshysy qol qoıǵan turǵyn úı saıasatyn reformalaý jónindegi zańnamalyq ózgeristerge sáıkes turǵyn úıge muqtaj adamdardy esepke qoıýdyń jańartylǵan tártibi engizildi.
Sondaı-aq memlekettik qoldaý sharalaryn iske asyrý qaǵıdalary bekitildi. Atalǵan quqyqtyq tetikter turǵyn úıge muqtaj azamattardyń barlyq sanattaryna teń múmkindikter berýge jáne áleýmettik ádilettilikti qamtamasyz etýge baǵyttalǵan.
— Osyǵan baılanysty turǵyn úıge kezekte turǵan azamattar sanynyń qomaqty bolýyna baılanysty jáne qoldanystaǵy memlekettik qoldaý quraldary bar bolǵandyqtan jastar men jas otbasylar úshin bólek baǵdarlama/erekshe quqyqtyq rejım engizý jalpy qaǵıdattardy buzýy jáne turǵyn úıge muqtaj ózge azamattar arasynda áleýmettik teńgerimsizdik táýekelin arttyrýy múmkin ekenin atap ótemiz. Sondyqtan usynylyp otyrǵan bastamany iske asyrý orynsyz dep paıymdaımyz. Al bul baǵyttaǵy jumysty qoldanystaǵy tetikter aıasynda, teń quqyqtar men biryńǵaı qaǵıdattardy saqtaı otyryp tıimdi júrgizý qajet dep sanaımyz, — dedi Oljas Bektenov.
Aıta keteıik, Otbasy bank 2 naýryzdan bastap turǵyn úı kezeginiń tártibin ózgertti.
