«Jas Otan» myńdaǵan órenniń saıası jáne ómir mektebine aınaldy - Danııar Súndetbaev
Shara «EKSPO-2017» Halyqaralyq kórmesiniń Kongress-ortalyǵynda ótip jatyr. «Jańa álemge jol salamyz» atty Gala-forým elimizdiń barlyq óńirinen kelgen 1500-den astam belsendi jasotandyqtyń basyn qosty.
«Bul sezdiń tarıhı mańyzy zor. Sebebi, osydan týra 10 jyl buryn «Jas Otannyń» alǵashqy sezi ótken bolatyn. Osy 10 jyldyń ishinde «Jas Otan» Jastar qanaty ózimizde myńdaǵan jastyń saıası jáne ómir mektebine aınaldy. Búgingi sezde óńirlerden kelgen 600 delegat, 1500-ge jýyq belsendi jas bas qosyp otyr. Kúni keshe jarııalanǵan Bes áleýmettik bastama (QR Prezıdentiniń - avt) boıynsha barlyq usynystarymyzdy ortaǵa salamyz. Sezd sońynda is-sharamyzdyń nátıjesi retinde qorytyndy qujat qabyldanatyny josparlanýda. Sezdiń taǵy bir ereksheligi bar. Shara alǵash ret vırtýaldy shyndyq formatynda kórsetilýde. Dál qazir elimizdegi barlyq jasotandyq bizben birge vırtýaldy túrde osy zalda otyr. Olarǵa sálemimizdi joldaıyq», - dedi sharany ashqan «Jas Otan» JQ tóraǵasy Danııar Súndetbaev.
Búgin de jastar qanaty 150 myńnan astam jas qazaqstandyqtyń basyn biriktiretin biregeı uıym. Ár oblys, qala jáne aýdanda óz ókildikteri bar. Qazirgi tańda búkil Qazaqstan boıynsha «Jas Otannyń» 230-ǵa jýyq bastaýysh uıymy jumys isteıdi.
Partııa qyzmetin jańǵyrtý jónindegi Elbasy tapsyrmasy dál «Jas Otannyń» ishki reformasymen bastalǵanyn aıta ketý kerek. Atap aıtqanda, Jastar qanaty óziniń qurylymyn, jumys tásilin jáne ortalyq keńsesin túbegeıli ózgertken. Jumystyń barlyq baǵytyna jańa tetikter men quraldar engizildi. Soǵan oraı bastaýysh departamentter men bólimderdiń ornyna jasotandyqtar «Júrek», «Sana» jáne «Damý» atty úsh negizgi baǵytqa bólindi. Soǵan sáıkes ár baǵytqa belgili bir mindetter júkteldi. Máselen, «Júrek» baǵyty uıym qyzmetkerleri men músheleriniń jan-jaqty bilim alýy, ósýi jáne halyqaralyq yntymaqtastyq jumystaryna jaýapty. Al «Damý» baǵyty boıynsha elimizdegi barsha jasotandyqtarmen jáne óz qataryna belsendi jastardy kóptep jumyldyrý jumystary júrgiziledi. Sondaı-aq, osy baǵyt aıasynda jastar saıasatyna qatysty partııalyq tyńdaýlar ótkizilip, áleýmettik zertteýler júzege asyrylmaq. Al respýblıkalyq deńgeıdegi iri jastar jobalarymen aınalysatyn «Sana» baǵyty «Jas Otannyń» ıdeologııalyq jumystaryna jaýapty.
Búgin QR Prezıdenti Nursultan Nazarbaev sezge qatysýshy jastarǵa óz quttyqtaýyn joldady. Ony sezd delegattaryna Memlekettik hatshy Gúlshara Ábdiqalyqova oqyp berdi.
Aıta keteıik, keshe Astanadaǵy Kongress-ortalyqta «Jas Otan» jastar qanatynyń IV sezi bastaldy. Bıylǵy shara jańa formatta uıymdastyrylyp otyr. Shara barysynda Ortalyq keńestiń jańa músheleri saılandy. Olardyń ishinde «Ninety one» tobynyń ánshisi Dýlat Muhametqalıev te bar.
«Jas Otannyń» keıbir músheleri ondaı sheshimge qarsylyq bildirdi. «Nur Otan» partııasy Tóraǵasynyń birinshi orynbasary Máýlen Áshimbaev atalǵan másele boıynsha pikirin bildirdi.
