Jas oryndaýshylardyń respýblıkalyq baıqaýy óz máresine jetti
ASTANA. 31 naýryz. QazAqparat/Aınur Kenebaeva/ - Jas oryndaýshylardyń respýblıkalyq baıqaýy óz máresine jetti. Búgin Qazaq ulttyq óner ýnıversıtetiniń organ zalynda respýblıkalyq jas oryndaýshylar baıqaýynyń saltanatty jabylý rásimi boldy.
Eki jylda bir ret ótkiziletin respýblıkalyq baıqaýdy QR Bilim jáne ǵylym mınıstrligi men Qazaq ulttyq óner ýnıversıteti birlese uıymdastyrǵan bolatyn.
Oryndaýshylardy marapattaý rásimi barysynda aspapta oryndaý mamandyqtary boıynsha «fortepıano», «skrıpka», «alt», «vıolonchel» atalymdaryna sáıkes jeńimpaz atanǵan jas daryndarǵa dıplomdar tabys etildi.
«Respýblıkalyq baıqaý - ár oryndaýshy ómirindegi aıtýly oqıǵa, sebebi kez kelgen jarys qol jetkizgen jetistikterdiń kórsetkishi bolyp tabylady. Baıqaý barysynda qatysýshylardyń ónerine berilgen baǵa jas daryndardy anyqtaý ǵana emes, sonymen qatar mýzyka salasyndaǵy bolashaq mamandardy daıarlaý úrdisine jasalǵan saraptama deýge bolady. Osyndaı baıqaýlardyń otandyq jáne keleshekte sheteldik sahnalarda óner kórsetetin jas talanttardy anyqtaýdaǵy mańyzy zor», - dedi jeńimpazdardy marapattaý barysynda Álem ártisi Aıman Musaqojaeva.
